MFP ၊ ဩဂုတ် - ၁၇
ရှမ်းပြည်နယ် နောင်ချိုဘက်ကို လက်နက်သွားဝယ်ပြီး ပြန်လာတဲ့ FEA တပ်ပေါင်းစုအဖွဲ့က ရဲဘော် မန်းမိုးကြိုး အပါအဝင် လေးဦးဟာ မန္တလေးမြို့ကို ပြန်အဝင် မနေ့က ညနေပိုင်းမှာ လက်နက်တွေနဲ့တကွ ပျောက်ဆုံးနေတယ်လို့ အဲဒီတပ်ပေါင်းစုက ထုတ်ပြန်ပါတယ်။
FEA ဆိုတာ နိုင်ငံရေးအကျဉ်းသားများကိုယ်စားပြု တိုက်ခိုက်ရေးအဖွဲ့ Freeland Attack Force (FLA) ၊ Anonymous Force Mandalay (AFM)၊ Emerald Grils Army (EGA) သုံးခုပေါင်းပြီး ဖွဲ့စည်းထားတာဖြစ်ပြီးတော့ ဝက်လက်အခြေစိုက် ဒို့ညီနောင် Local PDF အတွက် ဩဂုတ်လ (၄)ရက်နေ့မှာ လက်နက်တွေ သွားဝယ်တာဖြစ်တယ်လို့ ဒို့ညီနောင် အဖွဲ့ဝင်၊ Anonymous Force Mandalay (AFM) ခေါင်းဆောင် ဗိုလ် Tiger က MFP ကို ပြောပါတယ်။
“ Ak47 တစ်လက်နဲ့ ကျည် ၂၀၀ ရယ်၊ အတိုနှစ်လက်ရယ်ဝယ်ပြီး မန်းလေးရောက်မှ အဆက်အသွယ်ပြတ်နေတာဗျ “ လို့ သူက ဆိုပါတယ်။
မန်းမိုးကြိုး(ခ) ကျော်လင်း(ခ) ကျော်လေးနဲ့ အခြားသုံးဦး ပျောက်ဆုံးနေတာဖြစ်ပြီး သူတို့နဲ့ ပတ်သက်တဲ့သူတွေ သတိထားရှောင်ရှားကြဖို့လည်း FEA တပ်ပေါင်းစုက သတိပေးထားပါတယ်။
သူတို့ဟာ စစ်အုပ်စုရဲ့ ဖမ်းဆီးမှုခံထားရတာဆိုရင် ဆုံးရှုံးမှု အရမ်းကြီးမားတယ်လို့လည်း ဗိုလ် Tiger က ဆိုပါတယ်။
“ ဝက်လက်မှာ စစ်ကြောင်းထိုးလို့ ငွေမလောက်တာတောင် နွားလေးရောင်းပြီး ဝယ်ထားရတာဗျ၊ မန်းလေးရောက်ပြီးမှ အဆက်အသွယ်ပြတ်နေတော့ သူတို့လည်း အားပျက်နေကြတယ် “ လို့ ဗိုလ် Tiger က ပြောပါတယ်။
ပြီးခဲ့တဲ့ ဩဂုတ်လ (၁၃)ရက် ညနေပိုင်းမှာလည်း မန္တလေး ချမ်းမြသာစည်မြို့နယ် အောင်ပင်လယ်ရပ်ကွက်ထဲမှာရှိတဲ့ တည်းခိုခန်းတစ်ခုမှာ လူငယ်လေးဦးကို KIA သင်တန်းဆင်းဆိုပြီး စစ်အုပ်စုက ဖမ်းဆီးခဲ့ပါသေးတယ်။
ဒါ့အပြင် မနေ့ ဩဂုတ်လ (၁၆)ရက်မှာလည်း ၅၄ လမ်း၊ ၂၃ လမ်းနဲ့ ၂၄ လမ်းကြားမှာ လူငယ်နှစ်ဦးကို စစ်အုပ်စုက ပစ်ခတ်ဖမ်းဆီးသွားပြီး ဘယ်သူတွေလည်းဆိုတာကိုတော့ မသိရသေးပါဘူး။
( Mandalay Free Press – MFP က တင်ဆက်တဲ့ ရုပ်သံ သတင်းတွေကို ယူကျူ့ https://www.youtube.com/c/MandalayFreePressMFP မှာလည်း ကြည့်ရှု့နိုင်ပါတယ်။)
#MFP #Mandalay_Free_Press #မန္တလေး #စစ်ကိုင်း #နိုင်ငံရေးအကျဉ်းသားများကိုယ်စားပြုတိုက်ခိုက်ရေးအဖွဲ့ #FEAတပ်ပေါင်းစု #မန်းမိုးကြိုး #ပျောက်ဆုံးနေ
