MFP ၊ သြဂုတ် - ၂၆
စစ်ကိုင်းတိုင်း၊ ကနီမြို့နယ်၊ မုံရွာ - ယာကြီး - ကလေး၀ လမ်းပေါ်မှာ သြဂုတ်(၂၃)နှင့် (၂၄)ရက်က နှစ်ရက်ဆက် ဖြစ်ပွားခဲ့တဲ့ တိုက်ပွဲမှာ ပြည်သူ့ရဲဘော် တစ်ဦး ကျဆုံးပြီး ကားတစ်စီး ဆုံးရှုံးခဲ့တယ်လို့ ကနီနယ် B-21 Kani PDF က သတင်း ထုတ်ပြန်ပါတယ်။
ကနီမြို့နယ်ထဲ ကားလမ်းတလျှောက် ရွာစဉ်ပတ်မွှေ လုယက် သောင်းကျန်း မီးရှို့နေတဲ့ ဖက်ဆစ်တပ်ကို ဒေသကာကွယ်ရေး ပူးပေါင်းတပ်တွေ့ နှစ်ရက်ဆက် တိုက်ခိုက်ခဲ့ရာ ဖက်ဆစ်တပ်သားတွေ အသေအပျောက် ရှိသလို ပြည်သူ့ကာကွယ်ရေး တပ်ဖွဲ့တွေဘက်က B-21 Kani PDF တပ်ဖွဲ့ဝင် ရဲဘော်ဟာလီ ကျဆုံးခဲ့တာလို့ ဆိုပါတယ်။
“မုံရွာ-ယာကြီး-ကလေးဝ လမ်းပိုင်း မိုင်တိုင်(၂၉)တွင် စစ်ကောင်စီတပ်နှင့် B-21 Kani PDF၊ မဟာမိတ် ရွှေတြိဂံတပ်ရင်းတို့ တိုက်ပွဲ ဖြစ်ပွားရာတွင် မိမိတို့ B-21 Kani PDF ရဲဘော် တစ်ဦး ကျဆုံးပြီး ကားတစ်စီး စစ်ခွေးတွေ မီးရှို့တာကို ခံခဲ့ရသည်။ ရဲဘော်အတွက် နောက်ဆုံးခရီးစဉ်ကို စစ်ကြောင်းထိုးနေတဲ့ ကြားကနေ ပြီးဆုံအောင် ဆောင်ရွက်ခဲ့သည်။ ရဲဘော် ဟာလီ တော်လှန်ရေးတာဝန်ကို ပြည်သူတွေအတွက် ရဲရင့်စွာ တိုက်ပွဲဝင်သွားခဲ့ပြီ ဖြစ်၍ သင့်တာဝန် ကျေပွန်ပါပြီ။ ငြိမ်းချမ်းစွာ အနားယူပါ။ RIP ပါ ရဲဘော် ဟာလီ” လို့ B-21 Kani PDF က ဖော်ပြပါတယ်။
ကားတစ်စီး အစားထိုး ပြန်ဝယ်ဖို့အတွက်ရော၊ လက်နက်ခဲယမ်းတွေ ဖြည့်တင်းဖို့အတွက်ပါ အများပြည်သူရဲ့ အကူအညီ အထောက်အပံ့တွေ လိုအပ်နေတယ်လို့ B-21 Kani PDF က ဆိုပါတယ်။
သြဂုတ်(၂၃)ရက်က ကနီမြို့နယ် ၊မုံရွာ - ယာကြီး လမ်းပိုင်း၊ အင်းပေါ်ဒေသတဝိုက် ရွာစဉ်ပတ်မွှေ လုယက် သောင်းကျန်းနေတဲ့ ဖက်ဆစ်တပ်ကို ယင်းမာခရိုင် တပ်ရင်း(၁၇) - B-21 Kani PDF နှင့် မဟာမိတ်တပ်ဖွဲ့တွေ ဖြစ်တဲ့ ရွှေတြိဂံတပ်ရင်း (GTF) ၊ DGF ၊ နဂါးညီနောင် ၊ CGYDF ၊ KLG ၊ အမိမြေ တော်လှန်ရေးအဖွဲ့၊ မြောက်ယမားတပ်ရင်း၊ ဆားလင်းကြီး မဟာမိတ်တပ်ပေါင်းစုနှင့် ညီနောင်မဟာမိတ် ပူးပေါင်းတပ်တွေက တိုက်ခိုက်ခဲ့ရာ ဖက်ဆစ်တပ်သား (၂၀)ခန့် ထိခိုက်ဒဏ်ရာရ သေဆုံးပြီး ပြည်သူ့ရဲဘော် လေးဦး ထိခိုက်ဒဏ်ရာ ရခဲ့တယ်လို့လည်း ဆိုပါတယ်။ တိုက်ပွဲအပြီး ဖက်ဆစ်တပ်က အင်တိုင်းတောရွာထဲ ဝင်မွှေလုယက် သောင်းကျန်းကာ ပြည်သူ့နေအိမ် ငါးလုံးကို မီးရှို့ဖျက်ဆီးသွားတယ်လို့ ဒေသကာကွယ်ရေး တပ်တွေက ထုတ်ပြန်ထားပါတယ်။
Photo - B-21 Kani PDF
( Mandalay Free Press – MFP က တင်ဆက်တဲ့ ရုပ်သံ သတင်းတွေကို ယူကျူ့ https://www.youtube.com/c/MandalayFreePressMFP မှာလည်း ကြည့်ရှု့နိုင်ပါတယ်။)
#MFP #Mandalay_Free_Press #မန္တလေး #စစ်ကိုင်း #ကနီ #တိုက်ပွဲ #KLGPDF #GTF #B21KaniPDF
