MFP ၊ ​အောက်တိုဘာ - ၁၈

စစ်ကိုင်းတိုင်းအထက်ပိုင်း ချင်းတွင်းမြစ်ဘေးက ခန္တီးမြို့ရဲစခန်းမှာ ဖမ်းဆီးခံထားရတဲ့ PDF နဲ့ KIA တပ်ဖွဲ့ဝင် (၁၄) ဦး ဒီက​နေ့ မနက်ပိုင်း စခန်းကို ​ဖောက်ထွင်းထွက်​ပြေးခဲ့ရာမှာ ငါးဦးကို​ စစ်အုပ်စုက ပြန်လည်​ ဖမ်းဆီးရမိသွားတယ်လို့ ​ဒေသခံ​တွေက​MFP ကို ပြောပါတယ်။

ဒီက​နေ့ အောက်တိုဘာ(၁၈)ရက် မနက်အ​စောပိုင်းမှာ စခန်းဖောက် ထွက်​ပြေးတာ ဖြစ်ပါတယ်။

PDF နဲ့ KIA တပ်ဖွဲ့ဝင်​တွေဟာ ဩဂုတ်(၃၀)ရက်က ​ခန္တီးနယ် နန်စီပွန်​​ ကျောက်စိမ်းတွင်းမှာ စစ်​အုပ်စုရဲ့ ဖမ်းဆီးခြင်းခံရတာ ဖြစ်ပြီး ဘယ်လိုဖမ်းဆီးခံထားရလဲဆိုတာ​တော့ အတိအကျ မသိ​ရကြောင်း ​ဒေသခံ​တွေက​ MFP ကို ပြောပါတယ်။

"အခုတစ်မြို့လုံး ပိုက်စိတ်တိုက် ရှာ​ဖွေ​နေတယ်။ ကုန်းလမ်း​ရေလမ်း အကုန်လုံး ပိတ်ဆို့ပြီး​တော့ ဘယ်မှ ထွက်လို့မရ​​အောင် လုပ်ထားတယ်။ မသင်ကာတဲ့ အိမ်​တွေကိုလည်း ဝင်စစ်​နေတယ်"လို့ ခန္တီး​ဒေသခံတစ်ဦးက​ ပြောပါတယ်။

အဆိုပါ PDF နဲ့ KIA တပ်ဖွဲ့ဝင်တို့ စခန်း​ဖောက်ထွင်းထွက်​ပြေးသွားပြီး​နောက် ချင်းတွင်းမြစ်​ကြောင်းမှာ​ ပြေးဆွဲ​နေတဲ့ အမြန်​ရေယာဥ်အားလုံးကို ပိတ်ဆို့ရပ်နားထားပြီး ကုန်းလမ်းတစ်​လျှောက်လုံးကိုလည်း လုံခြုံ​ရေးတင်းကြပ်စွာ ပိတ်ဆို့ထားတယ်လို့ ဆိုပါတယ်။

​ဖောက်ထွင်းထွက်​ပြေးသွားစဥ်မှာ စခန်းက​နေ လက်နက်တစ်လက်ပါ ယူ​ဆောင်သွားတယ်လို့ ​ဒေသခံ​တွေ​ပြောဆို​နေကြ​ပေမယ့် အတိအကျ​တော့ မသိရ​သေးပါဘူး။

#MFP #Mandalay_Free_Press #မန္တလေး #စစ်ကိုင်း #ခန္တီး