MFP ၊ စက်တင်ဘာ - ၂၉
မန္တလေးတိုင်း မြင်းခြံနယ်ထဲ ပြည်သူကို ရန်ပြု သောင်းကျန်းနေတဲ့ စစ်ကောင်စီခန့် အုပ်ကြီးနှင့် နောက်လိုက် စကစတွေကို ဒီနေ့လည်ပိုင်း ဝင်ရောက် ပစ်ခတ် ရှင်းလင်းခဲ့ရာ အုပ်ကြီးနှင့် စကစတွေ လက်နက်ချ ထွက်ပြေးသွားလို့ လူတွေ မရလိုက်ဘဲ သေနတ် ခုနှစ်လက်သာ သိမ်းယူ ရရှိခဲ့တယ်လို့ နွားထိုးကြီးမြို့နယ် ပြည်သူ့ကာကွယ်ရေး အဖွဲ့ - Natogyi People Defence Force – NPDF က သတင်း ထုတ်ပြန်ပါတယ်။
ဒီနေ့ စက်တင်ဘာ(၂၉)ရက် နေ့လည်(၁)နာရီက မြင်းခြံမြို့နယ် ပျော်ဘွယ် စံပြကျေးရွာက အုပ်ကြီးနှင့် နောက်လိုက် စစ်အုပ်စုကို NPDF တပ်ဖွဲက ဒုတိယအကြိမ် ဝင်ရောက် ရှင်းလင်းခဲ့တာလို့ ဆိုပါတယ်။
“ဒုတိယအကြိမ် ဝင်ရောက်စီးနှင်း ပစ်ခတ်ခဲ့ရာတွင် အုပ်ကြီးနှင့် စခများမှ လက်နက်ချ ထွက်ပြေး သွားသောကြောင့် ကျွန်ုပ်တို့ လိုက်လံ ပစ်ခတ် ဖမ်းဆီးသော်လည်း လုံခြုံရေး အခြေအနေအရ ပြန်လည် ဆုတ်ခွာခဲ့ရသည်။ အုပ်ကြီးနှင့် စခများ ကိုင်ဆောင်သော (MA-1) သုံးလက်၊ ရှော့ဂန်း တစ်လက်၊ ကာဘိုင် သုံးလက်၊ စုစုပေါင်း ခုနှစ်လက် တို့ကို သိမ်းဆည်းရရှိခဲ့ပါသည်” လို့ NPDF ရဲဘော်က MFP ကို ပြောပါတယ်။
မြင်းခြံနယ် ပျော်ဘွယ်ရွာက အုပ်ကြီးနှင့် စစ်အုပ်စုဟာ လက်နက်ကိုင်ပြီး ပြည်သူကို ရန်ပြု သောင်းကျန်းနေပေမယ့် သူတို့ကို သွားရောက် တိုက်ခိုက်ချိန်တိုင်း ပြန်လည် ခုခံတာ မရှိဘဲ ထွက်ပြေးနေတယ်လို့ NPDF ရဲဘော်က ပြောပါတယ်။
“ပျှော်ဘွယ်က အုပ်ကြီးက အဲ့ဒီရွာထဲမှာ တော်တော် သောင်းကျန်းနေတာ။ ဒါပေမယ့် သူ့ကို ဝင်ရှင်းရင်တော့ ပြန်မခုခံဘဲ အမြဲ ထွက်ပြေးနေတာ။ လွန်ခဲ့တဲ့ သုံးလလောက်ကလည်း ကျနော်တို့ ပထမ မစ်ရှင်အဖြစ် ဝင်ရှင်းသေးတယ်။ အဲ့တုန်းကလည်း အခုလိုပဲ။ အုပ်ကြီးက ထွက်ပြေးသွားလို့ သူ့ကို မရလိုက်ဘူး။ အဲ့ဒီတုန်းကလည်း စခ တစ်ကောင်ရယ်၊ ရှော့ဂန်းတစ်လက်ရယ်၊ ကာဘိုင်တစ်လက်ရယ်ပဲ ရလိုက်တာ။ အခုလည်း အုပ်ကြီးက ထွက်ပြေးသွားလို့ သူကို မရလိုက်ဘူး။ လက်နက်တွေပဲ ရလိုက်တာ” လို့ NPDF ရဲဘော်က ပြောပါတယ်။
မြင်းခြံနယ် ပျော်ဘွယ်ရွာထဲမှာ အုပ်ကြီးနှင့် စကစ ခြောက်ယောက်လောက် ရှိကာ ပြည်သူကို လက်နက်ပြ မိုက်ကြေးခွဲ သောင်းကျန်းနေတာလို့ ဆိုပါတယ်။
မြင်းခြံနယ် အပါအဝင် နွားထိုးကြီး၊ တောင်သာနှင့် ငါန်းဇွန်နယ်ထဲ စစ်အုပ်စုနှင့် ပေါင်းပြီး ပြည်သူကို အနိုင်ကျင့် ရန်ပြု သောင်းကျန်းနေတဲ့ အုပ်ကြီးတွေ အပါအဝင် စကစ ထောက်တိုင်တွေကို ဆက်လက် ရှင်းလင်းမယ်လို့ နွားထိုးကြီး NPDF က ထုတ်ပြန်ထားပါတယ်။
မြင်းခြံနယ် ပျော်ဘွယ်ရွာထဲ သောင်းကျန်းနေတဲ့ အုပ်ကြီးနှင့် စစ်အုပ်စုကို ရှင်လးင်းရာက သိမ်းဆည်း ရရှိခဲ့တဲ့ လက်နက်တွေ/Photo – NPDF
#MFP #MandalayFreePress #Mandalay_Free_Press #မန္တလေး #စစ်ကိုင်း #မြင်းခြံ #ပျော်ဘွယ် #NPDF
