MFP ၊ သြဂုတ် - ၄
စစ်ကိုင်းတိုင်း မြင်းမူမြို့နယ် လက်ပံကျင်ရွာထဲ အကြမ်းဖက် စီးနင်းကာ ထင်တိုင်းကျဲ လုယက် သတ်-ဖြတ် သောင်းကျန်းပြီး ပြန်ထွက်လာတဲ့ စစ်အုပ်စုနှင့် ဒေသကာကွယ်ရေး တပ်တွေ သြဂုတ်(၂)ရက်က တိုက်ပွဲ ဖြစ်ပွားခဲ့ပြီး နှစ်ဖက် အထိအခိုက် အကျအဆုံး ရှိခဲ့တယ်လို့ မြင်းမူမြို့ပြ တော်လှန်ရေးအဖွဲ့က သတင်း ထုတ်ပြန်ပါတယ်။
သြဂုတ်(၂)ရက် မနက်(၁၀)နာရီကျော်က လက်ပန်ကျင်းကျေးရွာအနီး၊ မြင်းမူနှင့် အရာတော်မြို့နယ်အစပ်မှာ လက်ပံကျင်းရွာထဲက ပြန်ထွက်လာတဲ့ စစ်အုပ်စုနှင့် ဒေသကာကွယ်ရေးတပ်တွေ တိုက်ပွဲဖြစ်ပွားခဲ့တာလို့ ဆိုပါတယ်။
“ထိတွေ့တိုက်ပွဲ ဖြစ်ပွားခဲ့ပါတယ်။ ဖြစ်စဉ်မှာ အကြမ်းဖက် စစ်ကောင်စီတပ်သား သေဆုံးမှုအား စုံစမ်းနိုင်ခြင်း မရှိသေးပါ။ ပြည်သူ့ကာကွယ်ရေး အဖွဲ့ဝင် နှစ်ဦး ကျည်ထိမှန် ကျဆုံးပြီး AK တစ်လက်၊ M-22 တစ်လက်၊ M-79 တစ်လက် ဆုံးရှုံးခဲ့ရသည်” လို့ မြင်းမူမြို့ပြ တော်လှန်ရေးအဖွဲ့က ဖော်ပြပါတယ်။
အကြမ်းဖက် စစ်အုပ်စုဟာ သြဂုတ်(၁)ရက် မနက်ပိုင်းမှာ မြင်းမူမြို့နယ်၊ လက်ပန်ကျင်းကျေးရွာကို နမခ (အနောက်မြောက်တိုင်း စစ်ဌာနချုပ် - မုံရွာ) ခွေးခြံကနေ ရဟတ်ယာဉ်ငါးစီးနဲ့ တစ်နာရီကျော်ကြာ ပစ်ခတ်ခဲ့ပြီး ရဟတ်ယာဉ်သုံးစီးနဲ့ စကစ အင်အား(၅၀)ကို ကျေးရွာပတ်ပတ်လည်မှာ ချထားကာ လက်နက်ကြီး လက်နက်ငယ်တွေနဲ့ တရစပ် ပစ်ခတ် စီးနင်းခဲ့တာလို့ ဆိုပါတယ်။
“ကျေးရွာ စာသင်ကျောင်းဝင်း အတွင်းမှာ Kg တန်းကလေးများ ကျောင်းသား/ ကျောင်းသူများ ဆရာ၊ဆရာမများ နဲ့ ကျေးရွာအတွင်းနေ ပြည်သူ(၁၀၀)ကျော်ကိုလည်း ဓားစာခံအဖြစ် ဖမ်းဆီးထားခဲ့ပါတယ်။ ကျေးရွာ စာသင်ကျောင်း၊ ဓမ္မာရုံနဲ့ ကျေးရွာ ဆေးပေးခန်းတို့ကိုလည်း ပစ်ခတ်ဖျက်ဆီး ထားခဲ့ပါတယ်။ ကျေးရွာအတွင်းမှ ကား၊ ဆိုင်ကယ်တွေကိုလည်း ပစ်ခတ်ဖျက်ဆီး မီးရှို့ခဲ့တာတွေ၊ ကျေးရွာနေအိမ်တွေကို ပစ်ခတ်ဖျက်ဆီးတာတွေ မွှေနောက်ခိုးယူတာတွေ ပြုလုပ်ခဲ့ ပါတယ်” လို့ မြင်းမူမြို့ပြ တော်လှန်ရေးအဖွဲ့က ဖော်ပြပါတယ်။
အဲ့ဒီနောက် စစ်အုပ်စုဟာ လက်ပံကျင်းရွာထဲ တစ်အိမ်တက်ဆင်း ဖောက်ထွင်းခိုးယူကာ ဒေသခံတချို့ကို သတ်ဖြတ်ပြီးနောက် ပြည်သူ(၁၅)ဦးခန့်ကို စစ်ဝတ်စုံ ဝတ်ခိုင်းပြီး ပစ္စည်းတွေ ထမ်းပိုးခိုင်းကာ ဓားစာခံ လူသားဒိုင်းအဖြစ် ဖမ်းခေါ်သွားပြီးနောက် သြဂုတ်(၂)ရက်မှာ ရွာထဲကနေ ပြန်ထွက်သွားတာလို့ ဆိုပါတယ်။
“အကြမ်းဖက် စစ်ကောင်စီတပ်သားများ ကျေးရွာအတွင်းမှ အရာတော်နယ်အစပ်ဘက်သို့ ထွက်သွားခဲ့ပြီး ဓားစာခံ အမျိုးသား(၁၅)ဦးခန့်ကိုလည်း ဖမ်းဆီးခေါ်ဆောင်သွားခဲ့ပါတယ်။ (ယခုအချိန်ထိ ပြန်လည်လွတ်မြောက်လာခြင်း မရှိသေးပါ)။ လွတ်မြောက်လာတဲ့ ကလေးတွေနဲ့ သက်ကြီးရွယ်အိုများ၊ အမျိုးသား အမျိုးသမီးများကို ဘေးလွတ်ရာကို ပို့ဆောင်ပေးခဲ့ပါတယ်။ သြဂုတ်(၃)ရက် နံနက်ပိုင်းမှာ ကျေးရွာအတွင်းသို့ မိမိတို့ကာကွယ်ရေး အဖွဲ့ဝင်များ ဝင်ရောက်နယ်မြေရှင်းလင်းရေး လုပ်ဆောင်ခဲ့ရာ ကွမ်းခြံတွင်း သေဆုံးပြည်သူတစ်ဦး၊ သေဆုံးအမျိုးသမီးတစ်ဦး၊ လက်ပြန်ကြိုးတုပ်ကာ ပစ်သတ်ခံထားရသူ အမျိုးသားတစ်ဦး၊ ထွန်စက်မောင်းနေသူ သေဆုံး အမျိုးသားတစ်ဦး၊ နှစ်ရက်အတွင်း အပြစ်မဲ့ ပြည်သူ အလောင်း လေးလောင်းနှင့် အပြစ်မဲ့ တိရစ္ဆာန်အလောင်းများ တွေ့ရှိခဲ့ရပြီး ကောင်းမွန်စွာ သင်္ဂြိုလ်တာတွေ၊ ပြည်သူပိုင်ပစ္စည်းများအား တွေ့ရှိ၍ ခေတ္တသိမ်းဆည်းတာတွေ ပြုလုပ်ခဲ့ပါတယ်။ အခုလက်ရှိမှာတော့ ရွာအတွင်းကို ပြည်သူတွေဝင်ထွက်ခွင့် ယာယီ ပိတ်ပင်ထားပါတယ်။ အခုလက်ရှိမှာတော့ အကြမ်းဖက်စစ်ကောင်စီ စစ်ကြောင်းဟာ ဓားစာခံ(၁၅)ယောက်နဲ့အတူ အရာတော်မြို့နယ် ကန်ရင်းကျေးရွာမှာ တပ်စွဲထားပါတယ်” မြင်းမူမြို့ပြ တော်လှန်ရေးအဖွဲ့က ဖော်ပြပါတယ်။
လက်ပံကျင်းရွာထဲ စီးနင်းသောင်းကျန်းခဲ့မှုနှင့် ပတ်သက်ပြီး စစ်လော်ဘီတွေက သတင်းဖြန့်ရာမှာ ဒေသခံ အမျိုးသမီး (၇၀)ကျော်နှင့် အမျိုးသား (၄၀)ကျော်ကို ဖမ်းဆီးခဲ့ပြီး အဲ့ဒီအထဲက ငါးဦးကို PDF အဖြစ် စွပ်စွဲကာ သတ်-ဖြတ်ခဲ့ကြောင်းနှင့် ကား၊ ဆိုင်ကယ်တွေ၊ လက်နက်ခဲယမ်းတွေလည်း အများအပြား သိမ်းဆည်း ရမိတယ်လို့ သတင်းဖြန့်ပါတယ်။
မြင်းမူမြို့နယ် လက်ပံကျင်းကျေးရွာထဲ တင်တိုင်းကျဲ လုယက်၊ သတ်-ဖြတ်၊ သောင်းကျန်းသွားတဲ့ စစ်အုပ်စုဟာ လက်ရှိမှာ အရာတော်နယ် တောင်ပိုင်းက ရွာတွေထဲ သုံးဖွဲ့ခွဲကာ ဆက်လက် စီးနင်း ဓားပြတိုက် သောင်းကျန်းနေတယ်လို့ ဒေသခံတွေက ပြောပါတယ်။
မြင်းမူမြို့နယ် လက်ပံကျင်းရွာထဲ စစ်အုပ်စု ထင်တိုင်းကျဲ လုယက် ဓားပြတိုက် သောင်းကျန်းသွားစဉ်/Photo – CJ
( Mandalay Free Press – MFP က တင်ဆက်တဲ့ ရုပ်သံ သတင်းတွေကို ယူကျူ့ https://www.youtube.com/c/MandalayFreePressMFP မှာလည်း ကြည့်ရှုနိုင်ပါတယ်။)
#MFP #Mandalay_Free_Press #မန္တလေး #စစ်ကိုင်း #မြင်းမူ #လက်ပံကျင်းရွာ #ပြည်သူ #ဖမ်းဆီး
