ထီးချိုင့်မြို့သိမ်းတိုက်ပွဲ ဘယ်လောက် အရေးကြီးသလဲ

 

(ထီးချိုင့်မြို့ သိမ်းနိုင်ပါက စစ်အုပ်စုကို လည်မြိုညှစ်လိုက်နိုင်သလို ဖြစ်ပြီး အညာမြေအတွက် စစ်ရေးအရ အရေးပါတဲ့ အလှည့်အပြောင်း ဖြစ်လာနိုင်။)

 

ရေးသူ - သက်တန့် (MFP)၊ ဆောင်းပါး

 

“အခုဟာက မီးလိုက်ရှို့ရုံတင် မကတော့ဘူး။ မီးကျည်တွေနဲ့ပါ မလောင်လောင်အောင် ပစ်ပြီး မီးရှို့နေတာ”

 

ထီးချိုင့်မြို့ကို အာဏာသိမ်း စစ်အုပ်စုက မီးရှို့ဖျက်ဆီးနေတဲ့ အခြေအနေနဲ့ ပတ်သက်ပြီး ထီးချိုင့်မြို့ခံ အသက်(၆၀)အရွယ် စစ်ရှောင်ပြည်သူ အမျိုးသားတစ်ဦးက ပြောပြနေတာပါ။ အဲ့ဒီ အမျိုးသားကြီး အပါအဝင် ထီးချိုင့် မြို့လုံးကျွတ် စစ်ပြေးနေရတာလည်း လနဲ့ချီ ကြာမြင့်နေပါပြီ။

 

စစ်ကိုင်းတိုင်း ကသာခရိုင် ထီးချိုင့်မြို့မှာ လွန်ခဲ့တဲ့ တစ်လကျော်ကတည်း တိုက်ပွဲတွေ အပြင်းအထန် ဖြစ်ပွား နေပါတယ်။ ထီးချိုင့်မြို့ဟာ မြို့ပေါ်ရပ်ကွက် ငါးရပ်ကွက်နဲ့ လူဦးရေ (၁၂၀၀၀) ကျော်ရှိတဲ့ မြို့ဖြစ်ပြီး တိုက်ပွဲတွေအတွင်း စစ်အုပ်စုက နေအိမ်တွေကို လိုက်လံ မီးရှို့တာ၊ လေကြောင်းဗုံးကြဲ ပစ်ခတ်လို့ ပျက်စီးတာ၊ မီးလောင်တာ စတာတွေကြောင့် ထီးချိုင့်မြို့ရဲ့ ငါးပုံ သုံးပုံလောက်ဟာ ပြာပုံဖြစ်ခဲ့ရပါပြီ။

 

ထီးချိုင့်မြို့ အမှတ်(၁)နဲ့ အမှတ်(၅) ရပ်ကွက် နှစ်ခုကို တော်လှန်ရေး တပ်ဖွဲ့တွေက ဝင်ရောက် စီးမိုး ထားတာကြောင့် မီးရှို့ဖျက်ဆီးခံရမှု မများပေမယ့် အမှတ် (၂)၊ အမှတ် (၃)နဲ့ အမှတ် (၄) ရက်ကွက်တွေက နေအိမ်တွေ အားလုံးနီးပါးကိုတော့ စစ်အုပ်စုက မီးရှို့ဖျက်ဆီးလို့ ပြာကျကုန်ပြီလို့ ဒေသခံတွေက ပြောပါတယ်။

ဒါ့အပြင် ထီးချိုင့်မြို့သိမ်းတိုက်ပွဲ စတင်ချိန် မြို့ထဲကနေ အချိန်မီ မထွက်ခွါလိုက်နိုင်ဘဲ ပိတ်မိနေတဲ့ ပြည်သူတွေလည်း စစ်အုပ်စုရဲ့ လေကြောင်းပစ်ခတ် ဗုံးကြဲမှုအတွင်း ထိခိုက် သေဆုံးခဲ့ရပြီး နိုဝင်ဘာ လဆန်းကနေ ဒီဇင်ဘာလဆန်းအထိ တစ်လတာအတွင်း ထီးချိုင့်ဒေသခံ ပြည်သူ အနည်းဆုံး(၂၀)ဦး သေဆုံးခဲ့သလို အတည်ပြုဖို့ခက်ခဲတဲ့ သေဆုံးမှုတွေလည်း ရှိနိုင်တယ်လို့ မြို့ခံတွေက ပြောပါတယ်။

 

ထီးချိုင့်မြို့ကို သိမ်းပိုက်နိုင်ဖို့ တော်လှန်ရေး အင်အားစုတွေ ဖြစ်တဲ့ ရက္ခိုင့်တပ်တော် - AA၊ ကချင် လွတ်မြောက်ရေး တပ်မတော် - KIA၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး -ABSDF၊ ပြည်သူ့ကာကွယ်ရေး တပ်မတော် - PDF၊ ပြည်သူ့ကာကွယ်ရေးအဖွဲ့ - ပကဖ နဲ့ ဒေသခံ တော်လှန်ရေးတပ် - LDF စတဲ့ တော်လှန်ရေး ပူးပေါင်းတပ်တွေက နိုဝင်ဘာ(၈)ရက်က စတင်ကာ မြို့သိမ်းတိုက်ပွဲ ဆင်နွှဲနေတာ ဖြစ်ပါတယ်။

စစ်အုပ်စုဟာ ထီးချိုင့်မြို့ကို လက်လွှတ် မဆုံးရှုံးစေဖို့ လေကြောင်းပစ်ကူနဲ့ အသည်းအသန် ခုခံနေသလို မြို့ကိုပါ မီးရှို့ ဖျက်ဆီးနေပြီး ထီးချိုင့်မြို့သိမ်း တိုက်ပွဲ တစ်လကျော်အတွင်း စစ်အုပ်စုက တိုက်လေယာဉ်တွေ၊ ရဟတ်ယာဉ်တွေ သုံးပြီး လေကြောင်းဗုံးကြဲပစ်ခတ်မှု အကြိမ်(၁၀၀)ဝန်းကျင် လုပ်ဆောင်ခဲ့တယ်လို့ ဒေသခံတွေက ပြောပါတယ်။

 

လက်ရှိမှာ ထီးချိုင့်မြို့ထဲက မြသိန်းတန်တောင်ကုန်း၊ အထကကျောင်းနဲ့ ကျောက်စေတီတောင် စတဲ့ နေရာတွေမှာ စစ်အုပ်စုက ဆက်လက် အထိုင်ချ တပ်စွဲနေပြီး မြို့မကျဖို့ ခုခံနေပါတယ်။

 

ထီးချိုင့်မြို့ မကျဖို့ စစ်အုပ်စုက အခိုင်အမာ ခံစစ်ပြင်ပြီး ခုခံနေသလို လေကြောင်းနဲ့ပါ မနားတမ်း စစ်ကူပေး နေတာကြောင့် လတ်တလော အခြေအနေအရ ထီးချိုင့်မြို့သိမ်း တိုက်ပွဲဟာ တစ်ဖက်ဖက်က အသာစီးရသွားတဲ့ အခြေအနေ မရောက်သေးဘူးလို့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး - ABSDF (မြောက်ပိုင်း) (Northern ABSDF) ရဲ့ ထောက်လှမ်းရေး တာဝန်ခံ ကိုစောက ပြောပါတယ်။

 

“ထီးချိုင့်မြို့သိမ်းတိုက်ပွဲက ဘယ်လို အရေးပါသလဲ”

 

ရက္ခိုင့်တပ်တော် - AA၊ တအာင်းတပ်မတော် - TNLA နဲ့ ကိုးကန့်တပ်မတော် - TNLA တို့ မြောက်ပိုင်းညီနောင် သုံးဖွဲ့ ဦးဆောင်ပြီး ရှမ်းမြောက်ဒေသမှာ စတင်ခဲ့တဲ့ အာဏာသိမ်း စစ်အုပ်စုကို ထိုးစစ်ဆင် တိုက်ခိုက်တဲ့ “၁၀၂၇” စစ်ဆင်ရေးဟာ နှစ်လနီးပါးကြာချိန်အထိ အောင်ပွဲတွေ ဆက်လက်ရရှိနေပြီး ရှမ်းမြောက်ဒသေက စစ်အုပ်စု စခန်းတွေ၊ မြို့တွေကို သိမ်းပိုက်နိုင်ခဲ့ပါတယ်။

 

၁၀၂၇ စစ်ဆင်ရေး လှိုင်းဂယက်ဟာ စစ်ကိုင်းတိုင်းကိုလည်း ရိုက်ခတ်လာပြီး စစ်ကိုင်းတိုင်းထဲက ကောလင်းလို ခရိုင်မြို့ကြီးကစလို့ တမူးနယ် ခါမ်းပါတ်မြို့၊ ဟုမ္မလင်းနယ် ရွှေပြည်အေးမြို့သစ်နဲ့ ကချင်ပြည်နယ်အစပ်၊ အင်းတော်နယ် မော်လူးမြို့တွေကို ရှေ့ဆင့်နောက်ဆင့်ဆိုသလို တော်လှန်ရေးတပ်တွေက သိမ်းပိုက်နိုင်ခဲ့ပါတယ်။

 

ထီးချိုင့်မြို့ကိုလည်း သိမ်းပိုက်နိုင်ဖို့ တော်လှန်ရေးတပ်တွေက နိုဝင်ဘာလဆန်းက စတင်ကာ ထိုးစစ်ဆင် တိုက်ခိုက်နေပေမယ့် စစ်အုပ်စုက ထီးချိုင့်မြို့ မကျဖို့ အသည်းအသန် ခုခံ ကာကွယ်နေတာကြောင့် ကောလင်းခရိုင်မြို့လို သုံးလေးရက်နဲ့ မသိမ်းနိုင်ဘဲ လနဲ့ချီကြာ ထိုးစစ်ဆင် တိုက်ခိုက်နေရတာ ဖြစ်ပါတယ်။

ထီးချိုင့်မြို့သိမ်း တိုက်ပွဲဟာ သာမန် မြို့သိမ်းတိုက်ပွဲတစ်ခုထက် ပိုမို လေးနက်ပြီး ထီးချိုင့်မြို့ကို လက်လွှတ်ရပါက စစ်အုပ်စုအတွက် လည်မြို အညှစ်ခံရသလို ဖြစ်နိုင်တာကြောင့် စစ်အုပ်စုက ထီးချိုင့် မကျဖို့ ရသမျှနည်းနဲ့ အသည်းအသန် ခုခံနေတာလို့ ထီးချိုင့်တိုက်ပွဲမှာ ပါဝင်နေခိုက်နေသူတွေ၊ ထီးချိုင့်နဲ့ ဆက်စပ်နေတဲ့ စစ်ကိုင်းတိုင်း၊ မန္တလေးတိုင်းနဲ့ ကချင်ပြည်က တော်လှန်ရေး တပ်ဖွဲ့တွေကို MFP က ပြောပါတယ်။

 

မြန်မာပြည်မြေပုံကို လူတစ်ဦးရဲ့ ကိုယ်ခန္ဓာအဖြစ် မြင်ကြည့်ပါက ထီးချိုင့်မြို့ဟာ လည်ပင်းနေရာမှာ တည်ရှိပြီး မြန်မာပြည်ရဲ့ ဦးခေါင်းပိုင်းလို့ ဆိုရမယ့် ကချင်ပြည်နယ်နဲ့ မြန်မာပြည်ရဲ့ အလယ်ပိုင်း၊ အောက်ပိုင်း ဒေသတွေကို ဆက်သွယ်ပေးထားတဲ့ လမ်းပန်းဆက်သွယ်ရေးအရ အချက်အချာကျတဲ့ နေရာမှာ တည်ရှိပါတယ်။

 

ထီးချိုင့်မြို့ဟာ ကချင်ပြည်နယ်ကို ဝင်ထွက်သွားလာလို့ရတဲ့ ကုန်လမ်းနဲ့ ရေလမ်းတွေကို စိုးမိုးထားတဲ့ နေရာမှာ တည်ရှိပြီး လမ်းပန်းဆက်သွယ်ရေးနဲ့ စစ်ရေးအရ အလွန် အချက်အချာကျ၊ အရေးပါတဲ့မြို့ ဖြစ်တယ်လို့ တော်လှန်ရေး အင်အားစုတွေက ပြောပါတယ်။

 

ထီးချိုင့်မြို့ကို သိမ်းပိုက်စိုးမိုးနိုင်ပါက ကချင်ပြည်နယ် ဝင်ထွက်ပေါက် လမ်းကြောင်းတွေ အားလုံးကို ပိတ်ဆို့နိုင်မှာ ဖြစ်သလို မန္တလေးတိုင်းကိုါ တော်လှန်ရေးတပ်တွေ လွတ်လွတ်လပ်လပ် ပိုမို ထိုးစစ်ဆင် နိုင်မှာ ဖြစ်ပါတယ်။ ဒါ့အပြင် ရှမ်းမြောက်နဲ့ပါ စစ်မျက်နှာ တဆက်တည်း ဖြစ်လာနိုင်ပြီး ရှမ်းမြောက်၊ ကချင်၊ မန္တလေး၊ စစ်ကိုင်း၊ ချင်း၊ မကွေး၊ ရခိုင်မှသည် ကရင်နီနဲ့ ကရင်ပြည်အထိ စစ်ရေးနယ်မြေတွေ တဆက်တစပ်တည်း ဖြစ်လာနိုင်တယ်လို့ တော်လှန်ရေး အင်အားစုတွေက သုံးသပ်ပါတယ်။

 

ဒါ့အပြင် လက်ရှိ NUG နဲ့ မဟာမိတ် တော်လှန်ရေး အင်အားစုတွေ ဖော်ဆောင်နေတဲ့ ကကြီးသုံးလုံး စစ်ဆင်ရေး ဆိုတဲ့ ကသာခရိုင်၊ ကောလင်းခရိုင်နဲ့ ကန့်ဘလူခရိုင် စစ်ဆင်ရေးမှာပါ တော်လှန်ရေး အဖွဲ့တွေက စစ်အုပ်စုကို အကြီးအကျယ် အသာစီး ရလာနိုင်ပါတယ်။ အဲ့ဒီလို စစ်ရေးနဲ့ ပထဝီ အနေအထားအရ ဗျူဟာမြောက်၊ အချက်အချာ ကျတဲ့ မြို့ဖြစ်တဲ့အတွက် စစ်အုပ်စုက ထီးချိုင့်မြို့ မကျဖို့ အသည်းအသန် ခုခံနေတာလို့ ဆိုကြပါတယ်။

 

“အရေးပါ အချက်အချာကျတဲ့ ထီးချိုင့်မြို့ရဲ့ ပထဝီ အနေအထား”

 

ဧရာဝတီမြစ် အနောက်ဘက်ကမ်းမှာ တည်ရှိပြီး ကချင်ပြည်နယ်နဲ့ ဆက်စပ်နေရာမှာ တည်ရှိတဲ့ ထီးချိုင့်မြို့ကို တော်လှန်ရေး အဖွဲ့တွေ သိမ်းပိုက်နိုင်ခဲ့ရင် ကချင်ပြည်နယ်အတွက် စစ်အုပ်စုရဲ့ ကုန်းလမ်းနဲ့ ရေလမ်း ထောက်ပို့ လမ်းကြောင်းတွေကို ပိတ်ဆို့နိုင်မှာ ဖြစ်ပါတယ်။ ဧရာဝတီမြစ်ကြောင်းအတိုင်း မန္တလေးကဆင့် ကချင်ပြည်ဘက် တက်လာမယ့် စစ်အုပ်စုရဲ့ ရေလမ်း ထောက်ပို့လမ်းကြောင်းကို ဖြတ်တောက်နိုင်သလို မန္တလေးနဲ့ စစ်ကိုင်းတိုင်းကတဆင့် တက်လာမယ့် ကုန်းလမ်း ထောက်ပို့ လမ်းကြောင်းတွေကိုလည်း ဖြတ်တောက်နိုင်မှာ ဖြစ်ပါတယ်။

မြန်မာပြည် အလယ်ပိုင်းကနေ ကချင်ပြည်နယ်ထဲကို ဝင်ရောက်နိုင်တဲ့ ကုန်းလမ်းဝင်ပေါက် နှစ်ပေါက်၊ အဓိက လမ်းမကြီး နှစ်ခု ရှိပြီး မန္တလေး-ဗန်းမော် လမ်းနဲ့ ရွှေဘို - မြစ်ကြီးနား လမ်းတွေပါ။ ဗျူဟာလမ်းလို့လည်း ခေါ်တဲ့ အဲ့ဒီ လမ်းမကြီး နှစ်ခုလုံးဟာ ထီးချိုင့်နယ်ကို ဖြတ်သန်းရတာ ဖြစ်ပါတယ်။

 

မန္တလေး-ဗန်းမော် လမ်းဟာ ဧရာဝတီမြစ်ရဲ့ အရှေ့ဘက်ခြမ်းမှာ ရှိတဲ့ လမ်းကြောဖြစ်ပြီး မန္တလေး-မတ္တရာ-စဉ့်ကူး-သပိတ်ကျင်း-တကောင်း-ထီးချိုင့် ကနေ ဧရာဝတီမြစ်ထဲ စီးဝင်တဲ့ ရွှေလီမြစ်ကူးတံတားကို ဖြတ်ပြီး ရွှေကူ-ဗန်းမော် အထိ ရောက်ရှိပါတယ်။ ဒါက မန္တလေးတိုင်း မြောက်ခြမ်းကနေ စစ်ကိုင်းတိုင်းနဲ့ ကချင်းထိ တဆက်တည်း ဖြစ်တဲ့ လမ်းပါ။

 

ရွှေဘို-မြစ်ကြီးနား လမ်းကတော့ ဧရာဝတီမြစ် နောက်ဘက်ကမ်းမှာ ရှိပြီး (၂၉၁)မိုင် ရှည်လျားပါတယ်။ အဲ့ဒီလမ်းဟာ ရွှေဘို-ခင်ဦး-ကန့်ဘလူ-ကောလင်း-အင်းတော်-နဘား-မော်လူး စတဲ့ စစ်ကိုင်းတိုင်း မြောက်ခြမ်း ကနေ နန့်စီအောင်-မော်ဟန်-မိုးညှင်း-မိုးကောင်း ကနေ မြစ်ကြီးနားမြို့ထဲအထိ တိုးလျိုးပေါက် ဖြစ်ပါတယ်။

 

အဲ့ဒီ လမ်းကြောင်းနှစ်သွယ်ကို ဧရာဝတီမြစ်ကူတံတား (ထီးချိုင့်)က ဆက်သွယ် ပေးထားပါတယ်။ ဒါကြောင့် ထီးချိုင့်မြို့ရဲ့ တည်နေရာဟာ မြစ်အရှေ့ဘက်က မန္တလေး-ဗန်းမော်လမ်းနဲ့ မြစ်အနောက်ဘက်က ရွှေဘို-မြစ်ကြီးနား လမ်းပေါ် ခွထိုင်ထားသလို ဖြစ်ပြီး မြစ်ကူးတံတားလည်း ရှိတာကြောင့် အင်္ဂလိပ်အက္ခါ (H) ပုံသဏ္ဍာန် အနေအထား ဖြစ်ပါတယ်။

 

ဒါ့အပြင် မန္တလေးကနေ စစ်ကိုင်းတိုင်း အထက်ပိုင်း ကသာ၊ ထီးချိုင့်က စလို့ ကချင်းပြည်နယ်အထိ ရောက်တဲ့ မန္တလေး - ဗန်းမော် ရေလမ်းကြောင်းဖြစ်တဲ့ ဧရာဝတီမြစ်ကြောင်းကိုလည်း ထီးချိုင့်မြို့က စိုးမိုးနိုင်ပါတယ်။

 

စစ်အုပ်စုဟာ ပြီးခဲ့တဲ့ ၂၀၂၂ က စတင်ပြီး မန္တလေး - ဗန်းမော် ရေလမ်း၊ ဧရာဝတီမြစ်ကြောင်းကို ကချင်ပြည် အတွက် အဓိက ထောက်ပို့ လမ်းကြောင်းအဖြစ် အသုံးပြုနေပါတယ်။ နွေဦးတော်လှန်ရေး အရှိန်မြင့် လာတာနဲ့အမျှ မိုင်းဆွဲခံရတာ၊ ဖြတ်တောက် တိုက်ခိုက် ခံရတာတွေကြောင့် စစ်အုပ်စုဟာ ကုန်လမ်းထက် ရေလမ်းကို ပိုမို အားပြုလာပြီး စစ်သင်္ဘောတွေနဲ့ ခဲယမ်းရိက္ခါ သယ်ယူပို့ဆောင်တာတွေ လုပ်နေတာ ဖြစ်ပါတယ်။

 

“ထီးချိုင့်က မြစ်ရိုးမှာလည်း မြစ်ဘေး ဖြစ်ရုံတင် မကဘူး သူက စစ်ကိုင်းတိုင်း ထဲကနေ တက်လာမယ့် ကချင်ပြည်နယ် မရောက်ခင်အထိ ကသာ မရောက်ခင်က ပိတ်ထားတာလည်း ဟုတ်တယ်။ နောက်တစ်ခုက မြစ်ကူး တံတား ရှိတယ်ဗျ။ ထီးချိုင့် မြစ်ကူးတံတားက အရှေ့ဘက် ဗန်းမော်-မန္တလေး လမ်းရယ်၊ အနောက်က ရွှေဘို - မြစ်ကြီးနား လမ်းရယ် အဲဒါကို ပြန်ပြီး ဆက်သွယ် ပေးထားတယ်။ ထီးချိုင့်က ကသာ ထက်တောင်မှ အချက်အခြာ ကျတယ်လို့ ပြောလို့ရတယ်”လို့ Northern ABSDF ထောက်လှမ်းရေးတာဝန်ခံ ကိုစောက ပြောပါတယ်။

 

“ထီးချိုင့် ရလိုက်ပြီဟေ့ဆိုရင် မြတောင်တို့၊ အနားမှာဆိုရင် နီကယ်စက်ရုံတို့၊ နီကယ်စက်ရုံဆိုရင် စစ်ကောင်စီ တော်တော်လေးကို အထိုင်ချထားတဲ့ အခြေအနေ ရှိတယ်။ ဒါတွေအားလုံး ထိန်းချုပ်နိုင်ပြီလို့ ပြောလို့ရမယ်”လို့ သူက ဆက်ပြောပါတယ်။

 

ဒါ့ကြောင့် ထီးချိုင့်မြို့ကို တော်လှန်ရေး အဖွဲ့တွေ သိမ်းပိုက် ရရှိလိုက်တာနဲ့ စစ်အုပ်စု အတွက် လည်မြို အညှစ်ခံလိုက်ရသလို ဖြစ်သွားစေမယ်လို့ တော်လှန်ရေး အင်အားစုတွေက သုံးသပ်ပါတယ်။

 

“ထောက်ပို့ လမ်းကြောင်းအတွက် ပြင်ဆင်ပေမယ့် မအောင်မြင်တဲ့ စစ်အုပ်စု”

 

စစ်အုပ်စုဟာ ကချင်ပြည် အပါအဝင် စစ်ကိုင်းတိုင်း အထက်ပိုင်းကို လက်နက်ရိက္ခာ ထောက်ပံ့နိုင်ဖို့ ၂၀၂၂ က စပြီး ကုန်းလမ်းထက် ရေလမ်းကို ပိုမို အသုံးပြုခဲ့ပါတယ်။ ဧရာဝတီနဲ့ ချင်းတွင်းမြစ်ကြောင်းကို အဓိက ထောက်ပို့ လမ်းကြောင်းအဖြစ် အသုံးပြုခဲ့ပေမယ့် မိုးရာသီ ရေများချိန်မှာသာ စစ်အုပ်စုရဲ့ ထောက်ပို့ သင်္ဘောတွေ သွားလာ အသုံးပြုလို့ အဆင်ပြေပါတယ်။ ထောက်ပို့အတွက် ရေလမ်းနဲ့ ကုန်းလမ်းတွေက အကန့်အသတ် ရှိတာကြောင့် စစ်အုပ်စုဟာ မန္တလေး-မြစ်ကြီးနား ရထားလမ်းကို ထောက်ပို့ လမ်ကြောင်းအဖြစ် အသုံးပြုလို့ ကြိုးစားခဲ့ပါတယ်။

 

ဒါကြောင့် အဲ့ဒီ မန္တလေး - မြစ်ကြီးနာ ရထားလမ်းပိုင်းကို ယခု ၂၀၂၃ ဇူလိုင်လောက်ကတည်းက စတင် ပြင်ဆင်ခဲ့ပါတယ်။ မန္တလေး- မြစ်ကြီးနား ရထားလမ်းပိုင်းဟာ မိုင်(၃၄၀)ကျော် ရှည်လျားပြီး မန္တလေးမြို့ကနေ စစ်ကိုင်း၊ ဝက်လက်၊ ရွှေဘို၊ ခင်ဦး၊ ကန့်ဘလူ၊ ကျွန်းလှ၊ ကောလင်း၊ ဝန်းသို၊ မော်လူး၊ အဲ့ဒီကမှတဆင့် ကချင်ပြည်နယ် မိုးညှင်း၊ ဟိုပင်၊ မိုးကောင်း၊ မြစ်ကြီးနားအထိ ဖြတ်သန်း ဖောက်လုပ်ထားတာ ဖြစ်ပါတယ်။

 

စစ်အုပ်စုဟာ ယခုနှစ် ဩဂုတ်လက စတင်ပြီး မန္တလေး - မြစ်ကြီးနား ရထားလမ်းပိုင်း၊ စစ်ကိုင်းမြို့ ရွာထောင်ဘူတာ ကနေ ဝက်လက်မြို့အထိ မိုင်(၄၀)အရှည် လမ်းပိုင်းကို ပြန်လည်ပြုပြင်နေပေမယ့် ငါးလအကြာ လက်ရှိအချိန်ထိ ပြီးစီးအောင် မပြင်နိုင်သေးဘဲ ဖြစ်နေတယ်လို့ ရွှေဘိုခရိုင် PDF တပ်ရင်း(၁၅) တပ်ရင်းမှူး ဗိုလ်ကောက်ရိုးက ပြောပါတယ်။

 

“ရထားလမ်းက ကျနော်တို့ ဝက်လက်ကနေ ရှေ့ဆက်ပြီး မတိုးတော့ဘူး။ ရထားလမ်းပြင်တာ ရပ်တန့်သွားပြီ။ ရှေ့တိုးနိုင်တဲ့ အခြေအနေ မရှိတော့ဘူး ဆိုတာက သူတို့မှာ ပါလာတဲ့ အင်အားရယ်။ သူတို့ ရထားပေါ်မှာ တင်ဆောင်လာတဲ့ သံလမ်း၊ ဇလီဖာတုံးတွေက ရှေ့ဆက်ပြီး လုပ်ဖို့ မလုံးလောက်တော့တာ။ ကျနော်တို့ တော်လှန်ရေး အင်အားစုတွေကလည်း သံလမ်းတွေကို ဖြတ်တောက်ထားတာပေါ့”

COVID-19 ကပ်ရောဂါ ဖြစ်ပွားစဉ်ကတည်းက ရထားပြေးဆွဲတာ မရှိတော့တဲ့ အဲ့ဒီ မန္တလေး - မြစ်ကြီးနား ရထားလမ်းကို စစ်အုပ်စုက ပြန်လည်ပြုပြင် မောင်းနှင်ဖို့ ကြိုးစားလာချိန် ဒေသခံ တော်လှန်ရေး တပ်တွေက သံလမ်းဘောင်တွေကို ဖြုတ်သိမ်းပစ်တာ၊ တံတားတွေကို ဖောက်ခွဲဖျက်ဆီး တာတွေကြောင့် စစ်အုပ်စု ရှေ့ဆက် မရဘဲ ဖြစ်ပါတယ်။

ပြီးခဲ့တဲ့ လပိုင်းအတွင်း ၁၀၂၇ စစ်ဆင်ရေးနဲ့အတူ နိုင်ငံတဝန်း မြို့သိမ်းစခန်းသိမ်း တိုက်ပွဲတွေ ပေါ်ပေါက်လာချိန် စစ်အုပ်စုဟာ အထက်ပါ စစ်ကိုင်းနဲ့ ဝက်လက်ကြား ရထားလမ်း ပြင်နေတဲ့ စစ်အုပ်စုကို ရဟတ်ယာဉ်နဲ့ ပြန်ခေါ်သွားတယ်လို့ ဗိုလ်ကောက်ရိုးက ပြောပါတယ်။

 

“ကကြီးသုံးလုံး (ကသာ၊ကောလင်း၊ကန့်ဘလူ) စစ်ဆင်ရေးရဲ့ သော့ချက်ဖြစ်တဲ့ ထီးချိုင့်”

 

ထီချိုင့်ကို သိမ်းပိုက်နိုင်ပါက ကကြီးသုံးလုံး လို့ခေါ်တဲ့ ကသာခရိုင်၊ ကောလင်းခရိုင်နဲ့ ကန့်ဘလူခရိုင် ဆိုတဲ့ တဆက်တည်း ရှိနေတဲ့ စစ်ကိုင်းတိုင်း အထက်ပိုင်း ဒေသတစ်ခုလုံးကို သိမ်းပိုက်ဖို့ ကြိုးစားနေတဲ့ စစ်ဆင်ရေး အတွက်လည်း အားသာချက်နဲ့ အကျိုးသက်ရောက်မှုတွေ များစွာ ရှိလာမှာ ဖြစ်ပါတယ်။

 

ကကြီးသုံးလုံးခရိုင်တွေကို သိမ်းပိုက်ပြီးတာနဲ့ ရွှေဘိုခရိုင် ကျော်လိုက်ရင် မုံရွာနဲ့ နီးကပ်သွားပြီး စစ်အုပ်စုရဲ့ အနောက်မြောက်တိုင်း စစ်ဌာနချုပ် (နမခ)ကို တိုက်ရိုက် ခြိမ်းခြောက်နိုင်မှာလည်း ဖြစ်ပါတယ်။

 

ကကြီးသုံးလုံး စစ်ဆင်ရေးမှာဆိုရင် လက်ရှိ ကောလင်းခရိုင်မြို့နဲ့ မော်လူးမြို့အပြင် ကန့်ဘလူမြို့နယ်က ချပ်သင်း ရဲစခန်းကိုပါ တော်လှန်ရေးတပ်ဖွဲ့တွေ သိမ်းပိုက်ထားပြီး ဖြစ်ပါတယ်။ ကောလင်းနဲ့ မော်လူးကြားမှာလည်း အင်းတော်မြို့နယ် ရှိပြီး စစ်အုပ်စုက အင်းတော်မြို့ပေါ်မှာသာ ရှိတော့တာ ဖြစ်ပါတယ်။

 

“အကုန်လုံးကတော့ ထီးချိုင့် သတင်းကိုပဲ စောင့်နေကြတဲ့ အနေအထားမျိုး ဖြစ်နေပါတယ်။ ကောလင်းခရိုင် ကောလင်းခရိုင်မြို့ကို သိမ်းထားပြီးပြီ ဆိုတော့ ကျန်တဲ့ ပင်လည်ဘူးတို့ ဝန်းသိုတို့က လှုပ်ရရှားရတာ လွယ်သွားတဲ့ အနေအထား ဖြစ်သွားတာပေါ့။ ကသာခရိုင်ကျတော့ ထီးချိုင့်ကို သိမ်းပြီးမှပဲ ကျန်တဲ့ သုံးမြို့နယ်က အဆင်ပြေမယ့် အနေအထားမျိုးတွေ ရှိတယ်ဗျ။ ထီးချိုင့် သိမ်းပြီးသွားရင် ကသာကတော့ အလိုအလျောက် ရသွားတဲ့ မြို့တစ်မြို့လို ဖြစ်သွားမှာပေါ့”လို့ ကသာခရိုင် ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့ - ပအဖ အတွင်းရေးမှူးက ပြောပါတယ်။

 

ကောလင်းမြို့နဲ့ ထီးချိုင့်မြို့ဟာ (၅၆)မိုင်သာ ကွာဝေးပြီး မြို့နယ်ချင်း ထိစပ်နေတာကြောင့် ထီးချိုင့်မြို့ကို သိမ်းပိုက်နိုင်ခဲ့ရင် ကောလင်းမြို့ကို ထိန်းချုပ်ထားရတဲ့ တော်လှန်ရေး အဖွဲ့တွေနဲ့ အုပ်ချုပ်ရေးအဖွဲ့တွေ အနေနဲ့လည်း ဝန်ပေါ့သွားစေမှာ ဖြစ်ပါတယ်။

 

လက်ရှိ တော်လှန်ရေး တပ်ဖွဲ့တွေက ကောလင်းမြို့ကို ထိန်းချုပ်ထားတာ တစ်လကျော်ကြာပြီ ဖြစ်ပြီး စစ်အုပ်စုက ကောလင်းကို ပြန်ရဖို့ ထိုးစစ်ဆင်လာတာ မျိုးတွေ ရှိပေမယ့် ကောင်းကောင်း ထိုးစစ်ဆင်နိုင်ခြင်းတော့ မရှိသေးဘူးလို့ ကောင်လင်းမြို့နယ် ပြည်သူ့ကာကွယ်ရေးအဖွဲ့ - ပကဖ တာဝန်ခံက ပြောပါတယ်။

 

ကောလင်းမြို့ကို မြေပြင်ကနေ ပြန်လည် ထိုးစစ်ဆင်ဖို့ ကောလင်းမြို့နဲ့ သုံးမိုင်ခန့် အကွာမှာ ရှိတဲ့ မိုးကောင်းတောင် ပေါ်မှာ စစ်အုပ်စု အင်အား (၁၅၀)ဝန်ကျင် ရောက်ရှိနေသလို ကောလင်းမြို့နဲ့ ငါးမိုင်သာကွာတဲ့ ဝန်းသိုမြို့ပေါ်ကနေလည်း စစ်အုပ်စုက လက်နက်ကြီးတွေနဲ့ ပစ်ခတ်လေ့ရှိပါတယ်။

 

“ထီးချိုင့်ကို သိမ်းမိရင်တော့ ကောလင်းမြို့ကို ထိမ်းတာ ဝန်တစ်ခုတော့ လျော့တာပေါ့။ နောက်တစ်ခုက ထီးချိုင့်၊ ကောလင်းကြား ကောလင်းနယ်မှာ ကျောက်ပုထိုး သတ္ထုတွင်းရယ်၊ ထီးချိုင့် အရှေ့ဘက်ကမ်းမှာ နီကယ်စက်ရုံရယ်က စကစက တော်လှန်ရေး အင်အားစုတွေကို ပေးချင်ပုံမရဘူး။ နောက်တစ်ခုက ဧရာဝတီ မြစ်ကူး တံတားလည်း ပါတာပေါ့။ နောက်ထပ် စစ်ရေးအရ အရေးပါတဲ့ အချက်တွေလည်း ရှိနေတော့ ထီးချိုင့်ကို လက်မလွှတ်ချင်တာလည်း ဖြစ်မယ်”လို့ ကောင်လင်းမြို့နယ် (ပကဖ) တာဝန်ခံက ယူဆပါတယ်။

 

“လက်ရှိ ထီးချိုင့်မြို့ရဲ့ စစ်ရေးအခြေအနေ”

 

ထီးချိုင့်မြို့သိမ်းတိုက်ပွဲ စတင်တဲ့ နိုဝင်ဘာလဆန်းက တော်လှန်ရေးတပ်တွေ အနေနဲ့ မြို့ကို သိမ်းပိုက်လုနီးပါး အခြေအနေထိ ရောက်ခဲ့ပါတယ်။ ထီးချိုင့်မြို့လုံးကျွတ် သိမ်းပိုက်ထိန်းချုပ်နိုင်ဖို့ နောက်ဆုံးလက်ကျန် စစ်အုပ်စု အထိုင်ချစခန်း နှစ်နေရာ ဖြစ်တဲ့ မြသိန်းတန်ဘုရား တောင်ကုန်းနဲ့ ထီးချိုင့်တံတားထိပ် ဘန်ကာကိုသာ သိမ်းပိုက်ဖို့ ကျန်ပြီး စစ်အုပ်စုက အဲ့ဒီ နှစ်နေရာ မကျဖို့ တစ်နေ့ကို (၁၀)ကြိမ်ထက်မနည်း လေကြောင်းပစ်ကူကာ ခုခံခဲ့တာ ဖြစ်ပါတယ်။

ထီးချိုင့်မြို့ဟာ မြို့တွင်းမှာလည်း တောင်ကုန်းတွေ ရှိနေတာကြောင့် စစ်အုပ်စုဟာ ကမ်းနဖူးမှာရှိတဲ့ မြသိန်းတန်ဘုရား တောင်ကုန်းပေါ်မှာ အခိုင်အမာ ဘန်ကာတွေ ဆောက်ပြီး အင်အား တော်တော်များများကို အဲဒီမှာ နေရာယူပြီး တောင်ကုန်းကို လာတိုက်ခိုက်တဲ့ တော်လှန်ရေးတပ်တွေကို အပေါ်စီးကနေ ပစ်ခတ်တာ၊ တိုက်ပွဲဖြစ်တိုင်း တောင်ကုန်းပတ်လည်ကို လေကြောင်းဗုံးကြဲတာကြောင့် တော်လှန်ရေးတပ်တွေ အနေနဲ့ အဲ့ဒီ မြသိန်းတန် တောင်ကုန်း ခေါ် MRTV Staion ကုန်းကို မသိမ်းနိုင်သေးတာလို့ မြေပြင်တိုက်ပွဲဝင် ရဲဘော်တွေက ပြောပါတယ်။

 

လက်ရှိမှာ ထီးချိုင့်တမြို့လုံးကို မစိုးမိုးနိုင်တော့တဲ့ စစ်အုပ်စုဟာ ထီးချိုင့်မြို့ရဲ့ အရှေ့ဘက်ကမ်းမှာ ရှိတဲ့ မြတောင်ကျေးရွာမှာ အင်အား အများအပြားနဲ့ အထိုင်ချပြီး ထီးချိုင့်မြို့တွင်းကို စစ်ကူတာ၊ မြတောင်ကနေ ထီးချိုင့်ဘက်ကို လက်နက်ကြီးနဲ့ လှမ်းထုတာတွေ လုပ်နေပါတယ်။

 

စစ်အုပ်စုရဲ့ ထောက်ပို့ ရဟတ်ယာဉ်တွေဟာ ထီးချိုင့်မြို့တွင်းမှာ မဆင်းသက်ရဲဘဲ မြတောင်ကျေးရွာမှာ ဆင်းသက်ပြီး မြတောင်ကနေမှ တဆင့် ခဲယမ်းရိက္ခါတွေကို စက်လှေနဲ့ တင်ကာ ညပိုင်း အချိန်တွေမှာ ဧရာဝတီမြစ်ကို ကူးပြီး ထီးချိုင့်မြို့တွင်းက စစ်အုပ်စု ရှိရာ ပို့ဆောင်ပေးနေတာ ဖြစ်တယ်လို့ ထီးချိုင့် အခြေစိုက် Special.9-HPDF တပ်ဖွဲ့ရဲ့ တာဝန်ရှိသူတစ်ဦးက ပြောပါတယ်။

တော်လှန်ရေးတပ်တွေ အနေနဲ့ ထီးချိုင့်မြို့က နောက်ဆုံး လက်ကျန် စစ်အုပ်စုကို တရစပ် ထိုးစစ်ဆင်တာမျိုး မလုပ်တော့ဘဲ တိုက်လိုက်၊ နားလိုက်နဲ့ ပိတ်ဆို့ထားတယ်လို့ ဆိုပါတယ်။ စစ်အုပ်စုကတော့ နေ့စဉ် လေကြောင်း ဗုံးကြဲတိုက်ခိုက်မှုတွေ ဆက်လုပ်နေပြီး ထီးချိုင့်မြို့ကိုသာမက ကျေးရွာတွေက ပြည်သူတွေကိုပါ ပစ်မှတ်ထား ဗုံးကြဲပစ်ခတ် သတ်ဖြတ်နေပါတယ်။ နိုဝင်ဘာ(၁၄)ရက် တစ်နေ့တည်းမှာကိုပဲ ထီးချိုင့်မြို့နယ် အလယ်တောကျေးရွာနဲ့ အင်းတိန်ရွာကို စစ်အုပ်စုက တိုက်လေယာဉ်နဲ့ ဗုံးကျဲပစ်ခတ် သတ်ဖြတ်ခဲ့ရာ ကလေးငယ်တွေ အပါအဝင် ဒေသခံပြည်သူ (၁၁)ဦး သေဆုံးခဲ့သလို စစ်အုပ်စုက ဗုံးကြဲသတ်ဖြတ်လို့ ထီးချိုင့်မြို့အနီး ကျေးရွာတွေက ဒေသခံပြည်သူ (၂၀)ကျော် သေဆုံးခဲ့ပြီး ဖြစ်ပါတယ်။

 

“တရုတ် ရင်းနှီးမြှုပ်နှံထားပြီး အကျိုးအမြတ်များတဲ့ ထီးချိုင့်က သတ္ထုတူးဖော်ရေး စီမံကိန်း”

 

ထီးချိုင့်မြို့အနီးမှာ တရုတ်က ဒေါ်လာသန်း(၈၀၀)နီးပါး ရင်းနှီးမြှုပ်နှံထားပြီး တရုတ်အတွက်ရော၊ စစ်အုပ်စု အတွက်ပါ အကျိုးအမြန် အများအပြား ရနေတဲ့ တကောင်းတောင် နီကယ်စက်ရုံ စီမံကိန်း တည်ရှိပါတယ်။

 

စက်ရုံက စစ်ကိုင်းတိုင်း ထီးချိုင့်နယ်ထဲမှာ ရှိပြီး သတ္ထုတူးတဲ့ နေရာက မန္တလေးတိုင်း သပိတ်ကျင်းနယ်ထဲမှာ ရှိတဲ့ တကောင်းတောင် နီကယ် တူးဖော်ရေး စီမံကိန်းဟာ မြန်မာနိုင်ငံရဲ့ အကြီးဆုံး သတ္ထုတူးဖော်ရေး လုပ်ငန်းတွေထဲက တစ်ခုဖြစ်ဖြစ်ပါတယ်။

 

ဒါ့အပြင် ထီးချိုင့်နဲ့ ထိစပ်နေတဲ့ ကောလင်းမြို့နယ်က ကျောက်ပုထိုးဒေသမှာလည်း ရွှေသတ္တု တူးဖော်ရေး လုပ်ငန်းတွေ အများအပြား ရှိပြီး အဲ့ဒီ ရွှေနဲ့ နီကယ် သတ္တုထုတ်လုပ်မှု တွေဟာ စစ်အုပ်စုအတွက် ဝင်ငွေရလမ်းဖြောင့်တဲ့ ထောက်ပို့ သယံဇာတတွေ ဖြစ်တာကြောင့် ထီးချိုင့်ကို လက်လွှတ်လိုက်ရတာနဲ့ တပြိုင်နက် အဲ့ဒီ သယံဇာတတွေကို စစ်အုပ်စု ဆုံးရှုံးရမှာ ဖြစ်ပါတယ်။ အဲ့ဒီ တကောင်းတောင် နီကယ် တူးဖော်ရေး စီမံကိန်းမှာတော့ စစ်အုပ်စုက အင်အားအတန်အသင့် အစောင့်ချထားတယ်လို့ ဆိုပါတယ်။

ထီးချိုင့်မြို့ကို တော်လှန်ရေး တပ်တွေက သိမ်းပိုက်နိုင်ခဲ့ရင် ကချင်ပြည်နယ်ဘက်ကနေ စစ်အုပ်စုတွေ အလုံးအရင်းနဲ့ စစ်ကူလာတာမျိုး မရှိနိုင်ဘဲ မန္တဘေးလက်က တက်လာမယ့် စစ်အုပ်စုတွေသာ ရှိနိုင်မယ်လို့ တော်လှန်ရေး အင်အားစုတွေက ပြောပါတယ်။ ကချင်ပြည်က စစ်အုပ်စုတွေ ထီးချိုင့်ဘက်ကို အလုံးအရင်းနဲ့ ဆင်းလာနိုင်ဖို့က ဖြစ်နိုင်ခြေ နည်းတယ်လို့ Northern ABSDF ထောက်လှမ်းရေး တာဝန်ခံ ကိုစောက အခုလို ရှင်းပြပါတယ်။

 

“မဖြစ်နိုင်ဘူးဗျ။ အဲသလို သူတို့ထားဖို့ မလွယ်လောက်ဘူး။ ဘာကြောင့်မို့လဲဆိုတော့ မိုးညှင်းခရိုင်လို့ ပြောလိုက်ရင် ဖားကန့်ကလည်း မိုးညှင်း ခရိုင်ထဲမှာ ပါတာကိုးဗျ။ သူတို့ ဖားကန့်ကို လက်လွှတ်ခဲ့မှာလား။ လက်မလွတ်ပါဘူး သူတို့။ လက်လွှတ်ဖို့ မလွယ်ဘူး။ မြစ်ဆုံကို သူတို့ ပစ်ထားခဲ့မလား ဆိုတော့ အဲဒါလည်း သူတို့မှာ သယံဇာတရှိတဲ့ နေရာတွေ၊ သူတို့ ဂုတ်သွေးစုပ်လို့ရတဲ့ နေရာတွေကို ပစ်ထားမှာတော့ မဟုတ်ဘူးဗျ။ အဲလို ပစ်ထားလိုက်တယ်ဟေ့ဆိုရင် ဟတဲ့နေရာကတော့ အတီးခံရမှာပဲလေ။ အဲဒီအတွက် သူတို့ ကျဉ်းထဲကျပ်ထဲ ရောက်နေတဲ့ အနေအထားပါ”

 

“မန္တလေး၊ ရှမ်းမြောက်နဲ့ စစ်ကိုင်း စစ်မျက်နှာ”

 

“အဲဒီ(ထီးချိုင့်)နေရာကို ကျနော်တို့ ကောင်းကောင်း ထိန်းလာနိုင်မယ်ဆိုရင် မန္တလေးတိုင်း၊ မန္တလေးမြို့တွေကို ကောင်းကောင်း ဝင်နိုင်တဲ့ အနေအထားတွေပဲလေ။ ပြီးတော့ ကျနော်တို့ဘက်က ထောက်ပို့ လမ်းကြောင်းတွေ မှာလည်း အဓိကကျတဲ့ ဟာတွေပေါ့။ စစ်ရေး အားသာချက်တွေ ချည်းပါပဲ”လို့ မန္တလေးတိုင်း မြောက်ခြမ်း သပိတ်ကျင်းမြို့နယ် ဗိုလ်လင်းယုန်တပ်ဖွဲ့ ခေါင်းဆောင် ဗိုလ်လင်းယုန်က ပြောပါတယ်။

 

မန္တလေးနဲ့ ရှမ်းမြောက်တခွင် ဖြစ်တဲ့ မဘိမ်း၊ မိုးကုတ်၊ မတ္တရာ၊ ကျောက်မဲနဲ့ မန္တလေး မြောက်ခြမ်း ထိုးစစ် အတွက်လည်း အရှိန်ရလာစေမှာ ဖြစ်ပါတယ်။

 

ထီးချိုင့်ကို သိမ်းပိုက်ရရှိတာနဲ့ ထီးချိုင့်-တကောင်း လွင်ပြင်ကို ထိန်းချုပ်နိုင်မှာ ဖြစ်သလို သပိတ်ကျင်း၊ တွင်းငယ်၊ (၇)မိုင်-မိုးကုတ် လမ်းကြောနဲ့ မတ္တရာ တခွင်မှာ စစ်အုပ်စု စိုးမိုးထိန်းချုပ်ထားတဲ ဖြစ်တဲ့ နေရာတွေကို ဖိအားပေးလာနိုင်မှာ ဖြစ်တယ်လို့ ဗိုလ်လင်းယုန်က ပြောပါတယ်။

 

“(၇)မိုင်ဝန်းကျင်ကတော့ တပ်ဝန်းကျင်တွေပဲ။ (၇)မိုင်တို့၊ ၁၃ တပ် (အမှတ် ၁၃ တန်းမြင့်လေ့ကျင့်ရေး) တို့ကတော့။ တွင်းငယ်၊ (၇)မိုင်တို့ကတော့ သူတို့တွေ ကောင်းကောင်း စိုးမိုးထားနိုင်တဲ့ နေရာတွေ၊ တပ်အထိုင်ချထားတဲ့ နေရာတွေပေါ့။ ကျနော်တို့ တော်လှန်ရေးသမားတွေ တော်တော် အားစိုက်ရမယ့် နေရာတွေပါပဲ”

 

“မန္တလေးတကြောနဲ့ မိုးကုတ်တကြောကျ ကျနော်တို့က ဂိတ်ချ စစ်ဆေးနိုင်ဖို့က ကျနော်တို့ ကြိုးစားဆဲပဲလေ။ ပြီးတော့ ရှောင်တခင်လောက်ပဲ ထိန်းချုပ်နိုင်သေးတဲ့ အနေအထားမျိုးပေါ့။ ထီးချိုင့်ရပြီးရင် ကျနော်တို့ အတွက်ကတော့ တတိယခြေလှမ်းလို့ ပြောလို့ရပါတယ်”လို့ သူက ဆိုပါတယ်။

 

ထီးချိုင့်နဲ့ မလှမ်းမကမ်းမှာ ရှိပြီး စစ်ကိုင်း၊ ကချင်းနဲ့ ရှမ်းမြောက် အစပ်မှာရှိတဲ့ ရှမ်းပြည်နယ် မဘိမ်းမြို့နယ်က ငါးအိုးမြို့ (ခြေလျင်တပ်ရင်း) ခလရ - ၁၂၁ တပ်ဟာလည်း ထီးချိုင့်ကျတာနဲ့ ကျဖို့ မခက်တော့သလို ရှမ်းမြောက် စစ်မျက်နှာနဲ့ပါ ဆက်သွားတဲ့ သဘော ဖြစ်သွားမယ်လို့ Northern ABSDF ထောက်လှမ်းရေး တာဝန်ခံ ကိုစောက ဆိုပါတယ်။

 

ငါးအိုးနဲ့ မဘိမ်းမြို့နယ်တွေဟာ TNLAနဲ့ KIA တပ်တွေ အင်အားကောင်းတဲ့ နေရာ ဖြစ်တာကြောင့် ရှမ်းမြောက် စစ်မျက်နှာနဲ့ပါ တဆက်တည်း ဖြစ်သွားမယ့် အနေအထားဖြစ်တယ်လို့ သူက ပြောပါတယ်။

 

တအာင်းတပ်မတော် - TNLA အနေနဲ့ ပြည်သူ့ကာကွယ်ရေးတပ်မတော် - မန္တလေး MDY-PDF နဲ့ ပူးပေါင်းပြီး မန္တလေးတိုင်း မတ္တရာ၊ မိုးကုတ်နဲ့ ရှမ်းမြောက် နောင်ချို၊ ကျောက်မဲ မြို့နယ်တွေမှာ ကနောင် စစ်ဆင်ရေး အဖြစ် ဇူလိုင်(၁၅)ရက်ကနေ စက်တင်ဘာ(၁၀)ရက်အထိ တိုက်ပွဲတွေ ဖော်ဆောင်ခဲ့ပါတယ်။ လက်ရှိမှာလည်း TNLA နဲ့ MDY-PDF တို့က မတ္တရာနယ်ကို ၁၀၂၇ စစ်ဆင်ရေး စစ်ရေးနယ်မြေ၊ တောင်သမန် စစ်ဆင်ရေး စစ်ရေးနယ်မြေအဖြစ် သတ်မှတ်ပြီး စစ်အုပ်စုကို ထိုးစစ်ဆင် တိုက်ခိုက်တဲ့ စစ်ဆင်ရေးတွေ ဆက်လက် ဖော်ဆောင်နေပါတယ်။

 

ဒီဇင်ဘာ(၁၂)ရက်ကပဲ မတ္တရာမြို့နယ် ကျောက်တံတားကျေးရွာ ဘုန်းကြီးကျောင်းမှာ အထိုင်ချ တပ်စွဲနေတဲ့ စစ်အုပ်စုကို MDY-PDF နဲ့ TNLA ပူးပေါင်းတပ်က ဝင်ရောက် တိုက်ခိုက်ခဲ့ရာ စစ်အုပ်စုတချို့ သေပြီး တချို့ကို သုံ့ပန်းအဖြစ် ဖမ်းမိခဲ့ပါသေးတယ်။

ဒီအခြေအနေတွေကို ကြည့်ခြင်းအားဖြင့် စစ်မျက်နှာတွေ ပေါင်းဆုံးပြီး သံပြိုင်တီးမယ့် အနေအထား ဖြစ်ပါတယ်။

 

ဒါတွေက အမျိုးသား ညီညွတ်ရေးအစိုးရ (NUG) ကာကွာရေးဝန်ကြီး ဦးရည်မွန် ပြောတဲ့ ကွက်ပြည့်နင်း၊ ကွက်စေ့ခင်းတဲ့ ဗျူဟာရဲ့ အစိတ်အပိုင်းတွေ ဖြစ်ပါတယ်။

 

ဒါ့ကြောင့် ထီးချိုင့်မြို့ကို သိမ်းနိုင်တာနဲ့ စစ်အုပ်စုကို လည်မြိုညှစ်ပြီးသား အခြေအနေ ဖြစ်လာမယ့်အပြင် အညာဒေသ လွတ်မြောက်ရေးနဲ့ နွေဦးတော်လှန်ရေးအတွက် အရေးပါတဲ့ စစ်ရေးအလှည့်အပြောင်း တစ်ခုလည်း ဖြစ်လာမှာ ဖြစ်ပါတယ်။ Northern ABSDF ထောက်လှမ်းရေး တာဝန်ခံ ကိုစောကတော့ အခုလို သုံးသပ်ပါတယ်။

 

“ဒီကောင်တွေ (စစ်အုပ်စု)က ထီးချိုင့်ကို လက်လွှတ်လိုက်ရရင်တောင် မြို့ကို ပြာချပစ်ခဲ့မယ့် ကောင်တွေ”