MFP ၊ အောက်တိုဘာ -၂၁
စစ်ကိုင်းတိုင်း ကသာခရိုင် ဗန်းမောက်မြို့နယ် အနောက်ပိုင်းက PDF စိုးမိုးနယ်မြေတွေဖြစ်တဲ့ ကြောင်လည်နှင့် မံယူးကြီးကျေးရွာတွေက ဆေးရုံ၊ဆေးခန်းတွေကို စစ်အုပ်စုက မနေ့ကနဲ့ ဒီနေ့ နှစ်ရက်ဆက် တိုက်လေယာဉ်တွေနဲ့ ဗုံးကြဲတိုက်ခိုက်တာကြောင့် ပြည်သူ တစ်ဦး သေဆုံးသလို ဆေးရုံ၊ဆေးခန်းတေါလည်း ပျက်စီးခဲ့တယ်လို့ ဒေသခံ သတင်းရင်းမြစ်တွေက ပြောပါတယ်။
စစ်အုပ်စုဟာ မနေ့က အောက်တိုဘာ(၂၀)ရက်မှာ မံယူးကြီးကျေးရွာ တိုက်နယ်ဆေးရုံကို ဗုံးကြဲတိုက်ခိုက်ခဲ့ပြီး ဒိနေ့ နေ့လည်ပိုင်းမှာ ကြောင်လည်ရွာက ဆေးရုံကို တိုက်လေယာဉ်နှစ်စင်းနဲ့ ဗုံးကြဲတာလို့ ဆိုပါတယ်။
"ဗန်းမောက် အနောက်ပိုင်း PDF စိုးမိုးနယ်မြေ တခုဖြစ်သည့် ကြောင်လည်ကျေးရွာကို ကုန်းလမ်းဖြင့် မတိုက်နိုင်တော့သည့် စစ်ကောင်စီတပ်မှ ယနေ့ နေလည်(၁၂)နာရီခွဲ ဝန်းကျင်အချိန်တွင် လေယာဉ်ဖြင့် ဗုံးကြဲသွားတယ်"လို့ ဗန်းမောက်မြို့ ဒေသခံတစ်ဦးက ဆိုပါတယ်။
ဒီနေ့ အောက်တိုဘာ(၂၁)ရက် နေ့လည်ပိုင်း စစ်အုပ်စုက တိုက်လေယာဉ်နှစ်စင်းနဲ့ ဗုံးကြဲခဲ့တဲ့ ကြောင်လည်ရွာဟာ PDF စိုးမိုးထိန်းချုပ်နယ်မြေဖြစ်ပြီး အဲ့ဒီကျေးရွာမှာ ဗန်းမောက်နယ်ထဲ ဖြစ်ပွားတဲ့ တိုက်ပွဲတွေကြောင့် မကျီးကုန်း၊ သရက်ကုန်း စတဲ့ ဗန်းမောက်နယ် အနောက်ပိုင်း ရှမ်းရွာတွေက စစ်ေ်ပြေးပြည်သူတွေ လာရောက်ခိုလှုံနေထိုငနေတဲ့ ကျေးရွာ ဖြစ်တယ်လို့ ဆိုပါတယ်။
"ယနေ့ နေ့လည်(၁)နာရီအချိန်တွင် ဗန်းမောက်မြို့နယ် ကြောင်လည်ရွာရှိ ဆေးရုံ၊ ဝန်ထမ်းအိမ်ယာနှင့် ခန်းမတို့အား စစ်လေယာဉ် နှစ်စီးဖြင့် ဗုံးကျဲသွားကြောင်း သတင်းရရှိပါသည်။ ပြည်သူတစ်ဦး သေဆုံးကြောင်း ကနဦး သိရှိရပါသည်။ ထိခိုက်ပျက်စီးမှုများအား စုံစမ်းနေဆဲ ဖြစ်ပါသည်။ ယမန်နေ့ကလည်း မန်ယူးကြီးကျေးရွာရှိ ဆေးပေးခန်းအား လေယာဉ်ဖြင့် ဗုံးကျဲသွားခဲ့ပါသည်။ ပြည်သူများအနေဖြင့် စစ်ဘေးရှောင်များအား ဝိုင်းဝန်း ကူညီကြပါရန်ပန်ကြားအပ်ပါသည်" လို့ ဗန်းမောက် တော်လှန်ရေး အင်အားစု - BR Team က ဖော်ပြပါတယ်။
ဗန်းမောက် အပါအဝင် ကသာနယ် အင်းတော်၊ ထီးချိုင့် ဒေသတွေမှာ ရွာစဉ်ပတ်မွှေ သောင်းကျန်းနေတဲ့ စစ်အုပ်စုကို KIA ၊ PDF ပူးပေါင်းတပ်တွေက တိုက်ခိုက်လျှက်ရှိရာ မြေပြင် တိုက်ပွဲမှာ အထိနာ အသေများတဲ့ စစ်အုပ်စုက တိုက်လေယာဉ် အသုံးပြုပြီး ဗုံးကြဲတိုက်ခိုက်တာတွေ၊ အရပ်သားပြည်သူတွေကို ပစ်မှတ်ထား တိုက်ခိုက်သတ်ဖြတ်တာတွေ ဆက်တိုက် ကျူးလွန်နေတယ်လို့ ဒေသခံတွေက ပြောပါတယ်။
အောက်တိုဘာ(၁၈)ရက် ညနေပိုင်းကလည်း မြေပြင်တိုက်ပွဲမှာ အထိနာ အသေများပြီးနောက် စစ်အုပ်စုက အင်းတော်မြို့နယ် အောင်ကုန်းရွာကို လေယာဉ်နဲ့ ဗုံးကြဲပြီး မီးရှို့ဖျက်ဆီးခဲ့ရာ နေအိမ်(၁၅)လုံးထက်မနည်း မီးလောင်ပြာကျခဲ့ပါတယ်။
ဗန်းမောက်မြို့နယ်ထဲ ဗုံးကြဲသွားတဲ့ တိုက်လေယာဉ်နှင့် စစ်အုပ်စုက လေယာသ်နဲ့ ဗုံးကြဲလို့ အင်းတော်နယ် အောင်ကုန်းရွာက နေအိမ်တွေ မီးလောင်ပျက်စီးစဉ်/Photo - အင်းတော် IR ၊ ဗန်းမောက်
#MFP #Mandalay_Free_Press #မန္တလေး #စစ်ကိုင်း #ကသာ #ဗန်းမောက် #အင်းတော် #တိုက်လေယာဉ် #ဆေးရုံ #ဆေးခန်း
