MFP၊ သြဂုတ် - ၆
စစ်ကိုင်းတိုင်း၊ ခင်ဦးနယ် မြင်းဒေါင်းရွာအနီးမှာ ဒီမနက်ပိုင်းက ဆိုင်ကယ်တွေနဲ့ ရွာစဉ်ပတ်မွှေ လုယက်ဓားပြတိုက်ဖို့ ထွက်လာတဲ့ စစ်ကောင်စီ အကြမ်းဖက်သမားတွေနှင့် ဒေသကာကွယ်ရေး တပ်ဖွဲတွေ ထိပ်တိုက်ရင်ဆိုင် တိုက်ပွဲဖြစ်ပွားခဲ့ပြီး စကစ ခြောက်ယောက် သေကာ ပြည်သူ့ရဲ့ဘော် တစ်ဦး ကျဆုံးခဲ့တယ်လို့ ခင်ဦးနယ် ဒေသကာကွယ်ရေး မဟာမိတ်အင်အားစု (KURDF) က သတင်း ထုတ်ပြန်ပါတယ်။
ဒီကနေ့ သြဂုတ်(၆)ရက် မနက် (၁၀)နာရီက ခင်ဦးမြို့နယ် မူးတိမ်ချောင်းဘက်ကနေ မြင်းဒေါင်းရွာဘက် ဆိုင်ကယ်လေးစီးနဲ့ ထွက်လာတဲ့ စစ်ကောင်စီ အကြမ်ဖက်သမား ရှစ်ဦးကို မူးတိမ်ချောင်း အတက်နားမှာ ဒေသကာကွယ်ရေး တပ်ဖွဲတွေက အနီးကပ် ပစ်ခတ်တိုက်ခိုက်ခဲ့ရာက တိုက်ပွဲ ဖြစ်ပွားခဲ့တာလို ဆိုပါတယ်။
"သူက စစ်ကြောင်း မဟုတ်ဘူးဗျ။ မူးတိမ်ချောင်းဆိုတဲ့ ဒေသခံအခေါ် နေရာမှာ တပ်စွဲထားတာ။ တပ်တွင်းလိုအပ်ချက် ဈေးဝယ် ဘာဝယ် ထွက်လာတာ။ မြင်းဒေါင်းမှာက နံနက်ခင်း ဈေးရှိတယ်" လို့ KURDF က ပြည်သူ့ရဲဘော်တစ်ဦးက ပြောပါတယ်။
အဲ့ဒီ တိုက်ခိုက်မှုမှာ အပြန်အလှန်ပစ်ခတ်မှု မိနစ်(၂၀)ခန့် ကြာမြင့်ခဲ့ပြီး စကစ ခြောက်ယောက်သေကာ ပြည်သူ့ရဲဘော် လူငယ်လေးတစ်ဦး ကျဆုံးခဲ့ရတယ်လို့ ဆိုပါတယ်။
အဲ့ဒီ တိုက်ပွဲမှာ ဒေသကာကွယ်ရေး တပ်ဖွဲ့တွေအနေနဲ့ ကျည်ဖိုး ကျပ်(၁၂)သိန်းခန့် အသုံးပြုခဲ့ရပြီး လက်ရှိမှာ တိုက်ပွဲတွေ ဆက်ဖြစ်နေတာကြောင့် လက်နက်ခဲယမ်းနှင့် ကျည်ဖိုး အကူအညီတွေ လိုအပ်နေတယ်လို ဆိုပါတယ်။
မူးတိမ်ချောင်းနား အထိုင်ချနေတဲ့ စစ်အုပ်စုဟာ မြင်းဒေါင်းရွာ အပါအဝင် အနီးက ရွာတွေထဲ ဝင်မွှေလုယက် ဓားပြတိုက်လေ့ ရှိပြီး ကြက်၊ ဝက် ကအစ လက်နက်ပြ ခြိမ်းခြောက် လုယူလေ့ ရှိတယ်လို့ ဆိုပါတယ်။
တချိန်တည်းမှာပဲ ဒီနေ့ သြဂုတ်(၆)ရက် မနက်(၁၁)နာရီကျော်မှာ ခင်ဦးနယ် ပျဉ်ထောင်ရွာမှာ အထိုင်ချနေတဲ့ စစ်အုပ်စုနဲ့ ပျူစောထီးတွေက မြင်းဒေါင်းရွာ အနီးက မြင်းကျရွာထဲ ဝင်မွှေလုယက် ဓားပြတိုက်ကာ ဒေသခံပြည်သူနှစ်ဦးကို သ-တ်-ဖြတ်သွားတယ်လို့ KURDF က ပြောပါတယ်။
ရေဦး၊ ခင်ဦး၊ တန့်ဆည်၊ ဒီပဲယင်းစတဲ့ ရွှေဘိုခရိုင်ထဲ စစ်ကောင်စီ အကြမ်းဖက်သမားတွေ ထင်တိုင်းကျဲ သောင်းကျန်းကာ ရွာစဉ်ပတ်မွှေ လုယက် ဓားပြတိုက်တာ၊ မီးရှို့တာ၊ ဒေသခံပြည်သူတွေကို ဖမ်းဆီးနှိပ်စက် သ-တ်-ဖြတ်တာတွေ ကျူးလွန်နေပါတယ်။
( Mandalay Free Press – MFP က တင်ဆက်တဲ့ ရုပ်သံ သတင်းတွေကို ယူကျူ့ https://www.youtube.com/c/MandalayFreePressMFP မှာလည်း ကြည့်ရှုနိုင်ပါတယ်။)
#MFP #Mandalay_Free_Press #မန္တလေး #စစ်ကိုင်း #ရွှေဘို #ခင်ဦး #PDF #တိုက်ပွဲ #ပြည်သူ
