ရေးသူ - သက်တန့် (MFP)၊ ဆောင်းပါး
ထုထည်အင်အား တည်ဆောက်ပြီး မြေပြန့်ဒေသ မဟာဗျူဟာ ထိုးစစ် မကြာခင် ရောက်လာတော့မယ်လို့ အမျိုးသား ညီညွတ်ရေး အစိုးရ (NUG)၊ ကာကွယ်ရေးဝန်ကြီးဌာန(MOD) ဝန်ကြီး ဦးရည်မွန်က မေ(၁၄)ရက်မှာ ကြုံးဝါး ပြောဆိုပါတယ်။
ပြည်သူ့ကာကွယ်ရေး တပ်မတော် - PDF၊ အမှတ်(၁) စစ်ဒေသ၊ မကွေးတိုင်း ကွပ်ကဲရေးရုံးက ဦးစီးကျင်းပတဲ့ အကြပ်သင်တန်း အပတ်စဉ် (၂) သင်တန်းဆင်းပွဲကို ပေးပို့တဲ့ ဦးရည်မွန်ရဲ့ သဝဏ်လွှာမှာ ပြောကြားထားတာပါ။
“ဖြစ်ပေါ်လာတဲ့ နိုင်ငံရေးနဲ့ စစ်ရေး အခြေအနေတွေအရ မကြာခင်ကာလမှာ ထုအင်အား တည်ဆောက်ပြီး မြေပြန့်ဒေသ မဟာဗျူဟာ ထိုးစစ် စတင်တော့မှာ ဖြစ်ပါတယ်။ ဒီ စစ်ရေး လိုအပ်ချက်တွေကို ကြိုတင် ပြင်ဆင်ဖို့ အတွက် ယခုလို သင်တန်းမျိုးတွေကို နေရာအနှံ့မှာ စီစဉ်ဖွင့်လှစ်နေခြင်း ဖြစ်တယ်”
434064843_454854856871244_7389338420470406819_n.jpg
MOD ဝန်ကြီး ဦးရည်မွန်နှင့် ကွယ်လွန်သူ KIA စစ်ဦးစီးချုပ်၊ PDF အမှတ်(၁) စစ်ဒေသမှူး ဒု-ဗိုလ်ချုပ်ကြီး Rခေါင်လွမ်း/Photo - MOD
၂၀၂၄ မေ(၅)ရက်က ကျရောက်တဲ့ PDF တပ်မတော် ဖွဲ့စည်း တည်ထောင်ခြင်း သုံးနှစ်ပြည့် ပြည်သူသို့ အစီရင်ခံရာမှာလည်း စစ်ဒေသနဲ့ စစ်နယ်ဝှန်းအလိုက် အင်အားထောင်ချီ ပါဝင်လျက် မွမ်းမံလေ့ကျင့်ခြင်း၊ စုဖွဲ့ တပ်ဆင်းခြင်း၊ ကွပ်ကဲမှု တည်ဆောင်ခြင်းတွေနဲ့ ထုအင်အား တည်ဆောက်နေတယ်လို့ ဦးရည်မွန်က ပြောပါတယ်။
“ယခုအခါ စစ်ဒေသနှင့် စစ်နယ်ဝှန်း အလိုက် အင်အား ထောင်ချီ ပါဝင်လျက် မွမ်းမံလေ့ကျင့်ခြင်း၊ စုဖွဲ့ တပ်ဆင်ခြင်း၊ ကွပ်ကဲမှု တည်ဆောက်ခြင်းဖြင့် ထုအင်အား တည်ဆောက်လျက် ရှိသည်။ ရည်ရွယ်ချက်မှာ မဟာဗျုဟာ ထိုးစစ်များ ဆင်နွှဲရန် ဖြစ်သည်။ ဆေးတပ်၊ ဆက်သွယ်ရေးတပ်၊ အင်ဂျင်နီယာတပ်၊ ယာဥ်ယန္တရားတပ် စသော လက်ရုံးတပ်များကိုလည်း အင်အား တိုးချဲ့ တည်ဆောက်နေသည်” လို့ ဦးရည်မွန်က ပြောကြောင်း MOD က ဖော်ပြပါတယ်။
မြေပြန့်ဒေသ မဟာဗျူဟာ ထိုးစစ်တွေ စတင်နိုင်ပြီ ဆိုတာနဲ့ နွေဦးတော်လှန်ရေးရဲ့ အဆုံးသတ်ပိုင်းကို ရောက်ရှိ ပြီလို့ ဆိုနိုင်ကြောင်း MOD က ဆိုပါတယ်။
“ထုအင်အားဖြင့် မဟာဗျုဟာ ထိုးစစ်ဆင်ခြင်းသည် တော်လှန်ရေး၏ အဆုံးသတ်တိုက်ပွဲသို့ ရောက်ရှိစေမည် ဖြစ်သည်။ ယခုလို အဆုံးအဖြတ် ကာလတွင် စစ်ရေးနှင့် နိုင်ငံရေး ဟန်ချက်ညီရေးသည် အသက်တမျှ အရေးကြီးသည်။ တော်လှန်ရေး အင်အားစုအားလုံး ဥာဏ်ပညာ ဦးစီးလျက် သတိ၊ ဝီရိယ အထူး စိုက်ထုတ် ကြိုးပမ်းရမည့် အချိန် ဖြစ်သည်” လို့ PDF သုံးနှစ်ပြည့် ပြည်သူသို့ အစီရင်ခံရာမှာ MOD က ဖော်ပြပါတယ်။
436276329_489095316780531_3805791399528912984_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
NUG က မြေပြန့်ဒေသလို့ ညွှန်းဆို ပြောကြားလာတာကြောင့် ခုခံတွန်းလှန်စစ် အားကောင်းတဲ့ မြေပြန့်ဒေသဟာ စစ်ကိုင်း၊ မကွေး၊ မန္တလေးတိုင်းတွေ ဖြစ်ပါတယ်။ အဆိုပါ ဒေသတွေဟာ PDF အမှတ် (၁) စစ်ဒေသရဲ့ ကွပ်ကဲမှု အောက်မှာ ရှိပါတယ်။ အမှတ် (၁) စစ်ဒေသ မှာ အညာဒေသ ဖြစ်တဲ့ စစ်ကိုင်း၊ မကွေးနဲ့ မန္တလေးက အဓိက ဖြစ်ပြီး ကချင်၊ ချင်းနဲ့ ရှမ်းမြောက် ဒေသတွေလည်း ပါဝင်ပါတယ်။
အမှတ် (၁) စစ်ဒေသ ဖြစ်တဲ့ ကချင်၊ ချင်းနဲ့ ရှမ်းမြောက်ဒေသတွေမှာ ရှိတဲ့ EAO (Ethnic Armed Force) တိုင်းရင်းသား တော်လှန်ရေး အဖွဲ့တွေက မြို့တွေ၊ စခန်းတွေကို နေ့စဉ်နီးပါး သိမ်းပိုက်နေပြီး မြေပြန့်ဒေသ၊ တနည်းအားဖြင့် အညာဒေသ ဖြစ်တဲ့ စစ်ကိုင်း၊ မကွေး၊ မန္တလေးတိုင်းမှာတော့ မြို့သိမ်း၊ စခန်းသိမ်း ထိုးစစ်တွေ လုပ်ဆောင်နိုင်မှု အားနည်း နေပါသေးတယ်။
ဒါ့ကြောင့် ဦးရည်မွန်ပြောသလို မြေပြန့်ဒေသ မဟာဗျူဟာ ထိုးစစ် စတင်နိုင်ပါက အမှတ် (၁) စစ်ဒေသ တခုလုံးကို လွှမ်းခြုံတဲ့ မဟာဗျူမြောက် ထိုးစစ်ကြီး ဖြစ်လာမှာ ဖြစ်ပါတယ်။ ဒါ့အပြင် အဆိုပါ စစ်ဒေသ တစ်ခုလုံးဟာ နယ်မြေချင်း ထိစပ်နေပြီး စစ်နယ်ဝှန်းလည်း ကျယ်ပြန့်လာမှာ ဖြစ်ပါတယ်။
photo_2024-06-21_12-34-41.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MDY-PDF
ဒါပေမယ့် မြေပြန့်ဒေသ မဟာဗျူဟာ ထိုးစစ်ဆင်နိုင်ဖို့ MOD အောက်မှာရှိတဲ့ တော်လှန်ရေး တပ်ဖွဲ့တွေရဲ့ ပြင်ဆင် စုဖွဲ့မှုနဲ့ လက်နက်ခဲယမ်း တပ်ဆင်မှု အပိုင်းတွေမှာ အားနည်းချက်တွေ များစွာ ရှိသေးတယ်လို့ မြေပြင် တော်လှန်ရေး တပ်ဖွဲ့တွေက ပြောကြပါတယ်။
- စစ်ဒေသမှူး အပြောင်းအလဲ
အမှတ်(၁)စစ်ဒေသကို ၂၀၂၁ နှစ်လည်ပိုင်းက စတင် ဖွဲ့စည်းခဲ့ရာမှာ စစ်ဒေသမှူး အဖြစ် ကချင်လွတ်လပ်ရေး တပ်မတော် (KIA) စစ်ဦးစီချုပ် ဒုတိယ ဗိုလ်ချုပ်ကြီး Rခေါင်လွမ်းက တာဝန်ယူ ကိုင်တွယ် ခဲ့ပါတယ်။ မေ(၁၃)ရက်က ဒု-ဗိုလ်ချုပ်ကြီး Rခေါင်လွမ်း ကွယ်လွန်သွားတာကြောင့် အမှတ် (၁) စစ်ဒေသ၊ စစ်ဒေသမှူး လစ်လပ်သွားပါတယ်။
421716069_425544343135629_8875093108868410823_n.jpg
MOD ဝန်ကြီး ဦးရည်မွန်နှင့် ကွယ်လွန်သူ KIA စစ်ဦးစီးချုပ်၊ PDF အမှတ်(၁) စစ်ဒေသမှူး ဒု-ဗိုလ်ချုပ်ကြီး Rခေါင်လွမ်း/Photo – MOD
ဒု-ဗိုလ်ချုပ်ကြီး Rခေါင်လွမ်းဟာ KIA စစ်ဦးစီးချုပ် မဖြစ်မီ KIA ဒု-စစ်ဦးစီးချုပ်အဖြစ် တာဝန်ထမ်းဆောင်စဉ် ကတည်းက စတင်ဖွဲ့စည်းစ အမှတ်(၁) စစ်ဒေသရဲ့ စစ်ဒေသမှူး အဖြစ် တာဝန်ယူခဲ့သူ ဖြစ်ပါတယ်။ ဒါကြောင့် အမှတ်(၁) စစ်ဒေသမှူး ခန့်အပ်ရေးနဲ့ ပတ်သက်လို့ NUG နဲ့ KIA ကြား ဘယ်လို သဘောတူညီချက် ရှိတယ်ဆိုတာ မသိရပါဘူး။
ပြီးခဲ့တဲ့ မေ(၁၈)ရက်ကတော့ ကွယ်လွန်သူ ဒု-ဗိုလ်ချုပ်ကြီး R ခေါင်းလွမ်းရဲ့ နေရာအတွက် KIA ဒုတိယစစ်ဦးစီးချုပ် ဖြစ်တဲ့ ဗိုလ်ချုပ် အောင်ဆိုင်းလာကို KIA က စစ်ဦးစီးချုပ်အဖြစ် ခန့်အပ်လိုက်ပါတယ်။ KIA စစ်ဦးစီးချုပ် အသစ်က အမှတ် (၁) စစ်ဒေသရဲ့ စစ်ဒေသမှူး တာဝန်ပါ ယူ၊ မယူ ဆိုတာကိုတော့ NUG ဘက်က သီးခြား အတည်ပြု ထုတ်ပြန်တာ မရှိပါဘူး။
KIA စစ်ဦးစီးချုပ်သစ်ဟာ အမှတ် (၁) စစ်ဒေသရဲ့ စစ်ဒေသမှူး ဖြစ်လာဖို့ များတယ်လို့ အမှတ် (၁) စစ်ဒေသမှာ တာဝန် ထမ်းဆောင်နေတဲ့ EAO ခေါင်းဆောင် တစ်ဦးက MFP ကို ပြောပါတယ်။
- မြေပြင်မှာ ဘယ်လိုတွေ ပြင်ဆင်နေပြီလဲ
PDF တပ်မတော် ဖွဲ့စည်းတည်ထောင်တာ သုံးနှစ်ကျော် ရှိလာပါပြီ။ နိုင်ငံတဝန်းမှာ PDF တပ်ရင်း (၃၀၀)ကျော် ရှိတယ်လို့ NUG၊ MOD က ထုတ်ပြန်ထားပါတယ်။ တပ်ရင်းတစ်ရင်းမှာ PDF အင်အား(၂၀၀)ကျော်နဲ့ စုဖွဲ့ထားတာ ဖြစ်ပါတယ်။
မြေပြန့်ဒေသ မဟာဗျူဟာ ထိုးစစ်တွေ စတင်နိုင်ဖို့ NUG အနေနဲ့ မြေပြန်ဒေသ အညာက တော်လှန်ရေး တပ်ရင်း တပ်ဖွဲ့တွေ အပေါ် COC နှစ်ရပ်လို့ ခေါ်တဲ့ Chain of Command (အမိန့်နာခံမှု)နဲ့ Code of Conduct (ကျင့်ဝတ်စည်းကမ်းလိုက်နာမှု)ကို တည်ဆောက်အသက်သွင်းဖို့ လိုအပ်ပါတယ်။
447472611_498711665818896_7913554481367817454_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
လက်ရှိမှာ NUG ကာကွယ်ရေးဝန်ကြီးဌာနက အညာဒေသ PDF တပ်ရင်းတွေကို COC နှစ်ရပ် တည်ဆောက်နိုင်ဖို့ သုံးရင်း တစ်ဗျူဟာ၊ လေးရင်း တစ်ဗျူဟာ စသဖြင့် စုဖွဲ့ကာ ဗျူးဟာတွေအဖြစ် ပြောင်းလဲ ဖွဲ့စည်းနေပါတယ်။ MOD က သင်တန်းဆရာ စေလွှတ်ပေးပြီးနောက် PDF တွေကို စုပေါင်းကာ တိုက်ခိုက်ရေး ဗျူဟာတွေ အဖြစ် ဖွဲ့စည်းတာ ဖြစ်တယ်လို့ အညာတော်လှန်ရေး တပ်ဖွဲ့တွေက ပြောပါတယ်။
PDF တပ်ရင်းတစ်ရင်းကို ရဲဘော် (၃၀)ဦးစီ စသဖြင့် ထုတ်နှုတ်ပြီး တပ်ရင်းသုံးရင်းက ရဲဘော်(၉၀)ကို စုပေါင်းကာ တိုက်ခိုက်ရေး စစ်ကြောင်းဖွဲ့စည်းတာမျိုး လုပ်နေတာ ဖြစ်တယ်လို့ ဆိုပါတယ်။
MOD က တပ်ရင်းတွေကို ပေါင်းစုကာ ဗျူဟာတွေ ဖွဲ့စည်းပြီးနောက် သင်တန်းပို့ချကာ သင်တန်းပြီးဆုံးပါက လက်နက် တပ်ဆင်ပေးမယ်လို့ ပြောဆိုပေမယ့် သင်တန်းပြီးဆုံးတဲ့ တပ်ရင်းအများစု လက်နက်တော့ မရသေးဘူးလို့ စစ်ကိုင်းတိုင်းက PDF တပ်ရင်းတွေက ပြောပါတယ်။
447531336_498711705818892_8635830818956664140_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
လက်ရှိမှာ အညာက PDF တပ်ရင်းတွေကို NUG က တပ်စောင့်အဖြစ် တပ်ရင်းတစ်ရင်းကို လက်နက်ငါးလက်နဲ့ ကျည်(၅၀၀) တပ်ဆင် ပေးထားတာက လွဲပြီး ကျန်တာ လက်နက်ခဲယမ်း တပ်ဆင်ပေးတာ မရှိသလောက်ပဲလို့ ယင်းမာပင်ခရိုင်အတွင်းက PDF တပ်ရင်း ခေါင်းဆောင်တစ်ဦးက ပြောပါတယ်။
“ဝန်ကြီးဌာနက ရဲဘော်တွေ အစားအသောက် ရိက္ခါအတွက် တစ်လကို ဘယ်လောက်ဆိုပြီး ထောက်ပံ့ တာမျိုးတွေ ရှိတယ်။ အဲဒါကို ဘယ်လို လုပ်ရလဲဆိုတော့ ရိက္ခါအတွက်ရတဲ့ ငွေကြေးကို ရိက္ခါအတွက် မသုံးဘဲ လက်နက် ဝယ်ယူဖို့ လုပ်ဆောင်ရတယ်။ ရိက္ခါအတွက်ကျတော့ ပြည်သူတွေဆီက အလှူခံရတယ်”
ယင်းမာပင်ခရိုင်ဟာ တော်လှန်ရေး အားကောင်းတဲ့ ဒေသဖြစ်ပြီး ယင်းမာပင်၊ ဆားလင်းကြီး၊ ကနီနဲ့ ပုလဲ လေးမြို့နယ်မှာ NUG အသိအမှတ်ပြု PDF တပ်ရင်း (၄၀)ဝန်းကျင်အထိ ရှိပါတယ်။
PDF တပ်ရင်းတွေ စတင်ဖွဲ့စည်းစဉ်က တပ်ရင်းတစ်ရင်းကို တိုက်ခိုက်ရေးအင်အား (၂၀၀)ကျော်နဲ့ ဖွဲ့စည်းခဲ့ပေမယ့် လခစား ရဲဘော်တွေ မဟုတ်တာကြောင့် အချိန်ကြာတာနဲ့အမျှ (၂၄)နာရီအပြည့်၊ (၁၂)ရာသီပတ်လုံး အချိန်ပြည့် တာဝန် ထမ်းဆောင်နိုင်တဲ့ ရဲဘော် အင်အား လျှော့နည်းလာတယ်လို့ မြေပြင်တိုက်ပွဲဝင် တော်လှန်ရေး တပ်ရင်း၊ တပ်ဖွဲ့တွေက ပြောပါတယ်။
မိသားစု စားဝတ်နေရေးကြောင့် အလုပ်လုပ်ကိုင်ဖို့ တပ်ရင်းက နှုတ်ထွက်တာမျိုးတွေ ရှိပြီး လက်ရှိ အခြေအနေ အရ တပ်ရင်းတစ်ရင်းမှာ အချိန်ပြည့် တာဝန်ထမ်းဆောင်နိုင်တဲ့ တော်လှန်ရေး ရဲဘော်ဟာ ပျမ်းမျှ အားဖြင့် အင်အား(၇၀)ဝန်းကျင်သာ ရှိတယ်လို့ ဆိုပါတယ်။ တချို့တပ်ရင်းတွေလောက်ပဲ ဖွဲ့စည်းပုံအတိုင်း တင်းပြည့် ကျပ်ပြည့် ရှိတော့တယ်လို့ ဆိုပါတယ်။
446798500_497790105911052_98580018094002092_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
လက်ရှိ NUG က သုံးရင်းတစ်ဗျူဟာ၊ လေးရင်းတစ်ဗျူဟာ ဖွဲ့စည်းရာမှာလည်း အသက်ဝင်မှု အားနည်း သေးတယ်လို့ ရွှေဘိုခရိုင် PDF အမှတ် (၁၅) တပ်ရင်းရဲ့ တပ်ရင်းမှူးက ပြောပါတယ်။
“အသက်သွင်းတဲ့ နေရာမှာ အသက်တော့ မဝင်သေးဘူးလို့ ကျနော်တို့အနေနဲ့ ပြောရမယ်ပေါ့။ အသက် မဝင်သေးဘူး ဆိုတာက ဗျူဟာနဲ့ ပတ်သက်ပြီးတော့ ဗျူဟာမှူး၊ ဒု-ဗျူဟာမှူးနဲ့ သူတို့ရဲ့အောက်က အရာရှိတွေနဲ့ ကျနော်တို့ စုဖွဲ့မှုလုပ်တာမျိုး မလုပ်ကြရသေးဘူး”
MOD အနေနဲ့ မြေပြန့်ဒေသ မဟာဗျူဟာ ထိုးစစ်အတွက် နောက်ထပ် ပြင်ဆင်မှုတစ်ခုအနေနဲ့ MOD အောက်က တပ်ရင်းတွေကို လက်နက်ရရှိဖို့နဲ့ စစ်ရေး အတွေ့အကြုံ ရဖို့အတွက် ERO တိုင်းရင်းသား တော်လှန်ရေး တပ်ဖွဲ့တွေဆီ စေလွှတ်ပြီး သင်တန်းတက်စေတာ၊ လက်တွေ့ တိုက်ပွဲဝင်စေတာတွေလည်း လုပ်ဆောင် နေတယ်လို့ အညာ PDF တပ်ရင်းတပ်ဖွဲ့တွေက ပြောပါတယ်။
ERO ဒေသတွေကနေ ပြန်လည် ရောက်ရှိလာတဲ့ တော်လှန်ရေးရဲဘော်တွေ ရရှိလာတဲ့ လက်နက်တွေကို MOD က ပြန်လည် ခွဲဝေပေးမှာလား၊ ဘယ်လို ပြုလုပ်မယ်ဆိုတာတော့ အတိအကျ မသိရသေးဘူးလို့ ရွှေဘိုခရိုင် တပ်ရင်း (၁၅) တပ်ရင်းမှူးက ပြောပါတယ်။
446688709_497790259244370_7772948300164340133_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
ယင်းမာပင်ခရိုင်အတွင်းက တပ်ရင်းတစ်ခုဆိုရင် လက်နက်ခဲယမ်း ရရှိဖို့အတွက် ရဲဘော်(၁၀၀)ကျော်ကို KIA ဘက်ကို MOD ရဲ့ ချိတ်ဆက်ပေးမှုနဲ့ ပို့ဆောင်ထားတာ (၁၀)လဝန်းကျင် ရှိလာပြီ ဖြစ်ပြီး ရဲဘော်သုံးဦး ကျဆုံးကာ တစ်ဦး နင်းမိုင်းမိပြီး ခြေထောက် ဖြတ်လိုက်ရတယ်လို့ အဲ့ဒီ တပ်ရင်း တာဝန်ရှိသူက ပြောပါတယ်။
မြေပြန့်ဒေသက တော်လှန်ရေး ရဲဘော်တွေကို ERO ဒေသတွေဆီ ပို့ဆောင်ရာမှာ သုံးလလောက်သာ ကြာမြင့် မယ်လို့ MOD က အညာတပ်ရင်းတွေကို ပြောပေမယ့် ERO ဒေသတွေကို ရောက်သွားတဲ့ အခါမှာ သုံးလ မကဘဲ တချို့ဆိုရင် (၁၀)လဝန်းကျင် ကြာတဲ့အထိ မပြန်ကြရသေးဘဲ ဆက်လက် တိုက်ပွဲဝင်နေ ကြရတာလည်း ရှိတယ်လို့ အညာ PDF တပ်ရင်း ခေါင်းဆောင်တွေက ပြောပါတယ်။
ရဲဘော်တွေကို ဘယ်လောက်ကြာမယ်ဆိုတာကို တိတိကျကျ မပြောနိုင်တာကြောင့် PDF ခေါင်းဆောင်နဲ့ MOD က လိမ်ညာသလို ဖြစ်နေတဲ့ပုံစံ ခံစားနေရတယ်လို့ အညာ PDF တပ်ရင်းမှူးတွေက ပြောပါတယ်။
ဒါ့ကြောင့် မြေပြန့်ဒေသ ထိုးစစ်ကြီး စတင်မယ် ဆိုရင်တောင် အဆိုပါ ERO ဒေသတွေကို ပို့ထားတဲ့ မြေပြန့် ဒေသက ရဲဘော်တွေ ပြန်ရောက်လာတဲ့ အခါမှသာ စတင်နိုင်မှာ ဖြစ်တယ်လို့ ရွှေဘိုခရိုင်တပ်ရင်း (၁၅) တပ်ရင်းမှူးက သုံးသပ်ပါတယ်။
“မြေပြန့်ကို ထိုးစစ်ဆင်မယ့် အပိုင်ကဏ္ဍမှာ ကျတော့ သူတို့ လျာထားချက်က တပ်ရင်းအလိုက် AA ဘက်ဆို AA ဘက်၊ MNDAA ဘက်ဆို MNDAA ဘက်၊ TNLA ဘက်ဆို TNLA ဘက်ကို ပို့တဲ့ ရဲဘော်တွေကို သင်တန်းပြီးတာနဲ့ မြေပြင်ကို ပို့မယ်ဆိုရင်တော့ သူပြောတဲ့ မဟာဗျူမြောက် မြေပြင်ကို ထိုးမယ်လို့တော့ ကျနော်တို့ ထင်တယ်”
446659044_497790222577707_6090261569229100304_n.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MOD
၂၀၂၄ မတ်လဆန်းက ယင်းမာပင်ခရိုင် ကနီမြို့ကို မြို့သိမ်းတိုက်ပွဲ ဆင်နွှဲခဲ့ရာ (၁၂)ရက်အကြာ တိုက်ပွဲ အပြင်းအထန် ဖြစ်ပြီးနောက် မြို့ကို မသိမ်းနိုင်ဘဲ မေ(၁၃)ရက်မှာ တော်လှန်ရေးတပ်ဖွဲ့တွေ ကနီမြို့ကနေ ပြန်လည် ဆုတ်ခွါ ခဲ့ရပါတယ်။
(၁၂)ရက်ကြာ ကနီမြို့သိမ်း တိုက်ပွဲအတွင်း စစ်အုပ်စုဘက်က (၄၇)ယောက် သေပြီး တော်လှန်ရေး တပ်ဖွဲ့တွေဘက်က (၁၁)ဦး ကျဆုံးခဲ့ပါတယ်။ ကနီမြို့သိမ်းတိုက်ပွဲအတွင်း စစ်အုပ်စုက လေကြောင်းကို အဓိက သုံးပြီး စစ်အင်အား ဖြည့်တာ၊ စစ်ကူပို့လွှတ်တာ၊ ဗုံးကြဲ ပစ်ကူတာတွေကြောင့် ပြန်ဆုတ်ခဲ့ရတာလို့ အမှတ် (၁) စစ်ဒေသက ထုတ်ပြန်ပါတယ်။
အဲဒီ ကနီမြို့သိမ်း တိုက်ပွဲကို ယင်းမာပင်ခရိုင် ကွပ်ကဲရေး၊ ယင်းမာပင်ခရိုင် တပ်ရင်း (၁၊ ၂၊ ၆၊ ၉၊ ၁၇၊ ၁၈၊ ၂၁၊ ၂၂၊ ၂၃၊ ၂၅၊ ၂၇၊ ၃၀၊ ၇၊ ၁၀၊ ၁၁၊ ၁၂၊ ၂၄၊ ၂၆၊ ၂၉၊ ၃၁၊ ၃၃၊ ၃၄၊ ၃၆၊ ၃၇၊ ၃၂ ၊ ၂၈)၊ LPDF၊ ဆားလင်းကြီး စစ်ကြောင်း၊ Alpha စစ်ကြောင်း၊ ဒရုန်းတပ်ဖွဲ့တွေနဲ့ ကနီမြို့နယ် ပအဖ၊ ပကဖ တို့ ပူးပေါင်း တိုက်ခိုက် ခဲ့ကြတာလို့ ဆိုပါတယ်။
ယင်းမာပင်ခရိုင်မှာ PDF တပ်ရင်း (၃၇)ရင်း ရှိပြီး တပ်ရင်းတပ်ဖွဲ့တွေ များပေမယ့် ကနီမြို့ကို တိုက်ခိုက် သိမ်းပိုက်တဲ့အခါ တပ်ရင်းတွေမှာ လက်နက် မပြည့်စုံတာကြောင့် တပ်ရင်းတစ်ရင်းမှ ရဲဘော် ငါးယောက်၊ ခြောက်ယောက်သာ ပါဝင်နိုင်တဲ့ အခြေအနေမျိုး ရှိခဲ့တယ်လို့ မြေပြင်တိုက်ပွဲဝင် တော်လှန်ရေး ရဲဘော်တွေက ပြောပါတယ်။
“မြေပြန့်ဒေသထိုးစစ် တကယ်ဖြစ်လာနိုင်လား”
လက်ရှိ NUG ကျင့်သုံးနေတဲ့ စစ်ရေး မဟာဗျူဟာက ပြည်သူ့စစ် မဟာဗျူဟာ ဖြစ်ပြီး တနိုင်ငံလုံးအနှံ့ ကွက်ပြည့်နင်း၊ ကွက်စေ့ခင်းကာ ပြည်သူလူထုပါဝင်မှုနဲ့ ဖက်ဆစ်တပ် အမြစ်ဖြတ်ရေး တိုက်ခိုက်တာ ဖြစ်ပါတယ်။
“ပြည်သူ့ခုခံတွန်းလှန်စစ်၏ မဟာဗျုဟာမှာ ပြည်သူလူထု ထောက်ခံပါဝင်မှုဖြင့် ရရာ လက်နက် စွဲကိုင်လျက် ရန်သူ၏ ရုပ်ပိုင်း၊ စိတ်ပိုင်းကို တွန်းလှန်တိုက်ဖျက်သော ပြည်သူ့စစ် မဟာဗျုဟာကို အခြေ ခံသည်။ ဤ မဟာဗျုဟာအရ လူအင်အား၊ လက်နက်အင်အား တပ်ဆင် တည်ဆောက်ရာတွင် တနိုင်ငံလုံး အတိုင်းအတာဖြင့် ဒေသတိုင်းတွင် တိုက်ပွဲဝင်နိုင်ရေး ဦးတည်လျက် မိမိ ရန်ပုံငွေနှင့် လက်နက် အရင်းအမြစ်များကို ဖြန့်ဝေ တပ်ဆင်ခဲ့ရသည်။ တနိုင်ငံလုံး ကွက်ပြည့်အင်အား တည်ဆောက်ခြင်းသည် ပြည်သူ့စစ်မဟာဗျုဟာ ကျင့်သုံးမှု၏ ပထမအဆင့် ဖြစ်သည်။ ဤ မဟာဗျုဟာအရ ပြောက်ကျားခြွေစစ်ကို ကျယ်ပြန့်စွာ ဆင်နွှဲနိုင်ခဲ့ပြီး ရန်သူ အနေဖြင့် ၎င်း၏ အင်အားကို တနေရာတည်းတွင် စုစည်းမှု မပြုနိုင်တော့ပဲ ဖြန့်ခွဲထားရသည့် အတွက် အားနည်းချက်များ ဆက်တိုက် ဖြစ်ပေါ်ခဲ့သည်။ ပြည်သူ့စစ်မဟာဗျုဟာ ကျင့်သုံးလျက် ကွက်ပြည့် တိုက်ပွဲ ဝင်နိုင်မှုသည် ဤ ပြည်သူ့ နွေဦးတော်လှန်ရေး၏ အားသာချက်ဟု ဆိုနိုင်သည်” လို့ MOD က PDF တည်ထောင်ခြင်း သုံးနှစ်ပြည့် ပြည်သူသို့ အစီရင်ခံရာမှာ ဖော်ပြပါတယ်။
၂၀၂၁ စက်တင်ဘာမှာ စတင်ကြေညာခဲ့တဲ့ ပြည်သူ့ခုခံတွန်းလှန်စစ်ဟာ နှစ်နှစ်ပြည့်ချိန် ၂၀၂၃ စက်တင်ဘာမှာ ပြောက်ကျားစစ်ကနေ တဆင့်တက်ပြီး လှုပ်ရှားထိုးစစ်အဖြစ် စခန်းသိမ်း၊ မြို့သိမ်းတိုက်ပွဲတွေ ဆင်နွှဲ နိုင်ခဲ့တယ်လို့ MOD က PDF သုံးနှစ်ပြည့် အစီရင်ခံချက်မှာ ဖော်ပြပါတယ်။
တော်လှန်ရေး အင်အားစုတွေဟာ ပြောက်ကျားနည်းပရိယာယ် အားပြုပြီး ခုခံတွန်းလှန်စစ်ကို နှစ်နှစ်ကျော် အဆက်မပြတ် ဆင်နွှဲခဲ့သလို ဟန်ချက်ညီ စစ်ဆင်ရေးတွေဖြစ်တဲ့ ရှမ်းမြောက်နဲ့ ရခိုင်ဒေသမှာ ညီနောင် မဟာမိတ်သုံးဖွဲ့ ဖော်ဆောင်တဲ့ ၁၀၂၇ စစ်ဆင်ရေး၊ ကချင်ဒေသ စစ်ဆင်ရေးတို့ကြောင့် စစ်အုပ်စုရဲ့ အုပ်ချုပ်ရေးနဲ့ စစ်ရေး ယန္တရားတွေကို ဒေသအလိုက် ရှင်းလင်းနိုင်ခဲ့တယ်လို့ ဆိုပါတယ်။
နှစ်နှစ်ကျော်ကြာ ပြည်သူ့ခုခံစစ်နဲ့ တိုင်းရင်းသား တော်လှန်ရေး အဖွဲ့အစည်း (Ethnic Revolution Force – ERO) တွေရဲ့ ဟန်ချက်ညီ စစ်ဆင်ရေးတွေကြောင့် တပ်မ (၁၀) ခု၊ စကခ (စစ်ဆင်ရေးကွပ်ကဲမှုဌာနချုပ်) (၂၀)နဲ့ ဖွဲ့စည်းထားတဲ့ အာဏာသိမ်း စစ်အုပ်စုရဲ့ အမာခံ တိုက်ခိုက်ရေး အင်အားဟာ သုံးပုံနှစ်ပုံခန့် ယိုယွင်း ပြုန်းတီးခဲ့ပြီး စစ် အခြေအနေ ဖန်တီးနိုင်မှုဟာ တော်လှန်ရေး အင်အားစုတွေရဲ့ လက်ထဲ အပြည့်အဝ ရောက်ရှိခဲ့ပြီလို့ MOD က ဆိုပါတယ်။
လက်ရှိမှာတော့ ပြောက်ကျားစစ်၊ လှုပ်ရှားထိုးစစ်ကနေ နောက်ထပ် တဆင့်တက်ပြီး မြေပြန့်ဒေသ မဟာဗျူဟာ ထိုးစစ်တွေ ရောက်လာတော့မယ်လို့ MOD ဝန်ကြီး ဦးရည်မွန်က ပြောပါတယ်။
မြေပြန့်ဒေသ မဟာဗျူဟာ ထိုးစစ်အတွက် ပြင်ဆင်မှုတချို့ ရှိနေပေမယ့် လိုအပ်ချက် တွေလည်း များစွာ ရှိနေသေးတယ်လို့ အမှတ် (၁) စစ်ဒေသမှာ တာဝန်ထမ်းဆောင်နေတဲ့ EAO တာဝန်ရှိသူ တစ်ဦးက ဆိုပါတယ်။
“ပြောပြလို့ မရတဲ့ ပြင်ဆင်မှုတချို့တွေတော့ ရှိတယ်။ လိုအပ်ချက်ကလည်း ရှိနေသေးတယ်ဗျာ။ စစ်ကိုင်းတိုင်းလို့ ပြောလိုက်တာနဲ့ စစ်ဒေသ (၁)နဲ့ ပြောလိုက်တာနဲ့ကိုက ဧရာဝတီမြစ် အရှေ့ဘက်ခြမ်းဆိုရင် တကောင်း၊ ထီးချိုင့် အရှေ့ခြမ်း၊ တွင်းငယ်၊ အဲဒါတွေ အကုန်ပါတယ်လေဗျာ။ မကွေးအထိ ပါတယ်။ တမူး-ကလေး၊ အကုန်လုံး ပါတယ်။ တကယ်ပြည့်မီအောင် ဖြည့်ဆည်းနိုင်မလား။ ဘယ်နေရာကို အဓိက Target (ပစ်မှတ်)ထားပြီးတော့ လုပ်မလဲ ဆိုတာကတော့ ဒါကတော့သူတို့ လူကြီးတွေ ဘယ်လို စီစဉ်မလဲပေါ့”
photo_2024-06-21_12-34-43.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MDY-PDF
မြို့သိမ်းတိုက်ပွဲတွေ ဖော်ဆောင်မယ် ဆိုရင်လည်း ကောလင်းမြို့လို မဖြစ်ဖို့လိုအပ်ပြီး ထိန်းသိမ်းလိုက်တာ မကြာပေမယ့် မြို့လုံးကျွတ် ပျက်စီးဆုံးရှုံးသွားတာကြောင့် အများကြီး စဉ်းစားပြင်ဆင်ရမှာ ဖြစ်တယ်လို့ အမှတ် (၁) စစ်ဒေသမှာ တာဝန်ထမ်းဆောင်နေတဲ့ EAO တာဝန်ရှိသူတစ်ဦးက ပြောပါတယ်။
ပြီးခဲ့တဲ့ ၂၀၂၃ နိုဝင်ဘာမှ PDF အမှတ်(၁) စစ်ဒေသက ဦးစီးပြီး စစ်ကိုင်းတိုင်း ကောလင်းခရိုင် ကောလင်းမြို့ကို တိုက်ခိုက်ခဲ့ရာ သုံးလကြာ မြို့ကို သိမ်းပိုက်ထိန်းချုပ်နိုင်ခဲ့ပေမယ့် ၂-၂၄ ဖေဖေါ်ဝါရီမှာ စစ်အုပ်စုက ကောလင်းမြို့ကို ပြန်လည် တိုက်ခိုက် သိမ်းပိုက် ထိန်းချုပ်သွားပါတယ်။ စစ်အုပ်စုက ကောလင်းမြို့ကို မြို့လုံးကျွတ် ဖျက်ဆီးပြီး လက်ရှိအချိန်ထိ သောင်းချီတဲ့ ဒေသခံပြည်သူတွေကို မြို့ထဲ ပြန်လည် နေထိုင်ခွင့် မပြုသေးဘဲ မောင်းထုတ်ထားပြီး မြို့ကို ထင်တိုင်းကျဲ ဖျက်ဆီးနေတာ ဖြစ်ပါတယ်။
NUG ဦးဆောင်တဲ့ တော်လှန်ရေး တပ်ရင်း၊တပ်ဖွဲ့တွေ အနေနဲ့ စစ်ရေးအရ မြို့တွေ၊ ရွာတွေကို တိုက်ခိုက် တော့မယ် ဆိုရင်လည်း ရန်သူ အားနည်းတဲ့ နေရာကို ဝင်တိုက်သင့်တယ်လို့ အထက်ပါ EAO တာဝန်ရှိသူက မှတ်ချက်ပြုပါတယ်။
ကချင်ပြည်နယ်နဲ့ အနီးဆုံးဖြစ်ပြီး စစ်ကိုင်းတိုင်း အထက်ပိုင်းက မြို့ကြီးတွေဖြစ်တဲ့ ကသာ၊ မော်လိုက်နဲ့ ခန္တီးတို့ကို မသိမ်းနိုင်တာကြောင့် ခမ်းပါတ်နဲ့ မြို့သစ်တို့လို ရန်သူ စစ်အုပ်စု အားနည်းတဲ့ နေရာတွေကို ဝင်သိမ်းပိုက်တာ တွေ့ရတယ်လို့လည်း သူက ပြောပါတယ်။
လက်ရှိမှာ စစ်ကိုင်းတိုင်း အထက်ပိုင်း ကောလင်းခရိုင် ပင်လည်ဘူးမြို့ကို တော်လှန်ရေးတပ်ဖွဲ့တွေက မေ(၂၃)ရက်က စတင်ပြီး မြို့သိမ်းတိုက်ပွဲ ဆင်နွှဲနေပါတယ်။
ပင်လည်ဘူး မြို့သိမ်းတိုက်ပွဲဟာ ဦးရည်မွန်ပြောတဲ့ မြေပြန့်ဒေသ မဟာဗျူဟာထိုးစစ်ရဲ့ အစ ဖြစ်နိုင်တယ်လို့ ပင်လည်ဘူး မြို့နယ် စစ်ရေး သတင်းရင်းမြစ်တစ်ဦးက ယူဆပါတယ်။
“ဟုတ်ပါတယ်။ ဒီကပဲ စမယ်လို့ ကျနော်ထင်ပါတယ်။ မကြာခင်လည်း ကသာခရိုင်ထဲက မြို့တွေလည်း စလာလိမ့်မယ် လို့တော့ ထင်ပါတယ်။ KIA ကလည်း အထက်ပိုင်းကနေပြီးတော့ တော်တော် သိမ်းဆည်းနိုင်ပြီဆိုတော့ အောက်ကို ဆင်းလာတာနဲ့အမျှ ဒီဘက်တွေနဲ့ ဆက်စပ်ပြီးတော့ တိုက်ပွဲ ဖော်ဆောင်မယ်ဆို ပိုကောင်းပါမယ်” လို့ သူက ပြောပါတယ်။
ဒါ့ကြောင့် မြေပြန့်ဒေသ မဟာဗျူဟာထိုးစစ်လို့ ပြောဆိုတာကြောင့် ERO ဒေသတွေနဲ့ နီးစပ်တဲ့ မြေပြန့် ဒေသတွေက စတင်မလား ဆိုပြီး သုံးသပ်မှုတွေလည်း ရှိနေပါတယ်။
စစ်ကိုင်းတိုင်း အထက်ပိုင်းမှာဆိုရင် ကချင်ပြည်နယ်နဲ့ နီးစပ်တဲ့ ကသုံးလုံးခရိုင် (ကသာ၊ ကောလင်း၊ ကန့်ဘလူ) ဒေသလို၊ မန္တလေးတိုင်းထဲမှာ ဆိုရင် ရှမ်းမြောက်နဲ့ နီးစပ်ပြီး ပြည်သူ့ကာကွယ်ရေး တပ်မတော်-မန္တလေး (MDY-PDF) လှုပ်ရှားနေတဲ့ မတ္တရာနဲ့ ပြင်ဦးလွင်လိုမျိုး ဒေသတွေ ဖြစ်ပါတယ်။
photo_2024-06-21_12-34-50.jpg
တိုက်ပွဲဝင်ဖို့ လေ့ကျင့်၊ ပြင်ဆင်နေတဲ့ PDF ရဲဘော်တွေ/Photo - MDY-PDF
မြေပြန့်ဒေသ မဟာဗျူဟာ ထိုးစစ် လာတော့မယ်ဆိုတဲ့ ဦးရည်မွန်ရဲ့ ပြောဆိုချက်အပေါ် အမှတ်(၁) စစ်ဒေသမှာ တာဝန် ထမ်းဆောင်နေတဲ့ ERO ခေါင်းဆောင် တစ်ဦးကတော့ အခုလို မှတ်ချက်ပြုပါတယ်။
“မဖြစ်နိုင်ဘူးလို့ ပြောရင် ဦးရည်မွန် ပြောတာကို ကန့်လန့်တိုက်ရာ ကျတယ်။ ဖြစ်နိုင်တယ်လို့ ပြောလိုက်ရင်လည်း လွန်ရာ ကျတယ်ဗျ။ စောင့်တာကြည့်ပေါ့”
